ዮሐንስ 1

¹በመጀመሪያ ቃል ነበረ፤ ቃልም ከእግዚአብሔር ጋር ነበረ፤ ቃልም አምላክ ነበረ።^{abcd 2}እርሱ በመጀመሪያ ከእግዚአብሔር ጋር ነበረ። ³ሁሉም ነገር በእርሱ በኩል ሆነ፤ ከሆነውም ሁሉ ያለ እርሱ የሆነ ምንም ነገር የለም።^{e 4}ሕይወት በእርሱ ነበረ፤ ያም ሕይወት ለሰዎች ሁሉ ብርሃን ነበረ። ⁵ብርሃኑ በጨለማ ውስጥ ያበራል፤ ጨለማውም ሊያሸንፈው አልቻለም።^f

⁶ከእግዚአብሔር የተላከ አንድ ሰው ተገለጠ፤ ስሙም ዮሐንስ ነበረ። ⁷እርሱ ሁሉም በእርሱ በኩል እንዲያምኑ፣ ስለ ብርሃኑ ለመመስከር ምስክር ሆኖ መጣ። ⁸እርሱ ራሱ ብርሃኑ አልነበረም፤ ስለ ብርሃኑ ሊመሰክር መጣ እንጂ። ⁹ለሰው ሁሉ ብርሃን የሚሰጠው እውነተኛው ብርሃን ወደ ዓለም ይመጣ ነበር።^g

¹⁰እርሱ በዓለም ነበረ፤ ዓለም በእርሱ በኩል የሆነ ቢሆንም፣ ዓለም አላወቀውም። ¹¹ወደ ራሱ ስፍራ መጣ፤ የራሱ ሕዝብ ግን አልተቀበለውም። ¹²ነገር ግን ለተቀበሉት፣ በስሙም ላመኑት ሁሉ የእግዚአብሔር ልጆች የመሆን መብት ሰጣቸው፤ ¹³እነዚህ ልጆች የተወለዱት ከደም ወይም ከሰው ምኞት ወይም ከባል ፈቃድ አይደለም፤ ከእግዚአብሔር ነው እንጂ።^h

¹⁴ቃል ሥጋ ሆነ፤ በመካከላችንም መኖሪያውን አደረገ። ክብሩን አይተናል፤ ይህም ከአብ ዘንድ የመጣው የአንድያው ልጅ ክብር ነው፤ እርሱም ጸጋንና እውነትን የተሞላ ነው።^{ijk 15}ዮሐንስ ስለ እርሱ መሰከረ፤ ድምፁንም ከፍ አድርጎ እንዲህ አለ፦ «“ከእኔ በኋላ የሚመጣው ከእኔ ይበልጣል፤ ከእኔ በፊት ነበረና” ብዬ የተናገርኩለት ይህ ነው።» ¹⁶ሁላችንም ከሙላቱ ተካፍለናል፤ ጸጋን ከጸጋ በኋላ ተቀብለናል።^{l 17}ሕግ በሙሴ በኩል ተሰጥቷልና፤ ጸጋና እውነት በኢየሱስ ክርስቶስ በኩል መጡ። ¹⁸እግዚአብሔርን ያየ ማንም የለም። ራሱ አምላክ የሆነውና በአብ አጠገብ ያለው አንድያው ልጅ ግን ገልጦታል።^m

¹⁹የአይሁድ መሪዎች ካህናትንና ሌዋውያንን ከኢየሩሳሌም ወደ ዮሐንስ በላኩ ጊዜ ዮሐንስ የመሰከረው ይህ ነው። እነርሱም እንዲህ ብለው ጠየቁት፦ «ማን ነህ?» ²⁰እርሱም መልስ ከመስጠት ወደ ኋላ አላለም፤ በግልጽ እንዲህ አለ፦ «እኔ ክርስቶስ አይደለሁም።» ²¹ስለዚህ ጠየቁት፦ «ታዲያ ምንድን ነህ? ኤልያስ ነህ?» እርሱም፦ «አይደለሁም» አለ።

«ነቢዩ ነህ?» «አይ» ብሎ መለሰ። ²²ስለዚህ እንዲህ አሉት፦ «ታዲያ ማን ነህ? ለላኩን መልስ መስጠት አለብን። ስለ ራስህ ምን ትላለህ?» ²³ዮሐንስም በነቢዩ በኢሳይያስ ቃል እንዲህ ብሎ መለሰ፦ «እኔ በምድረ በዳ እንዲህ እያለ የሚጣራ ሰው ድምፅ ነኝ፦ “ለጌታ መንገዱን አቅኑ።”»

²⁴እነዚህ መልእክተኞች በፈሪሳውያን የተላኩ ነበሩ።^{n 25}እነርሱም እንደ ገና እንዲህ ብለው ጠየቁት፦ «ክርስቶስ ወይም ኤልያስ ወይም ነቢዩ ካልሆንክ፣ ታዲያ ለምን ታጠምቃለህ?» ²⁶ዮሐንስም እንዲህ ብሎ መለሰላቸው፦ «እኔ በውኃ አጠምቃለሁ። ነገር ግን እናንተ የማታውቁት አንድ ሰው በመካከላችሁ ቆሟል። ²⁷እርሱ ከእኔ በኋላ የሚመጣው ነው፤ እኔ የጫማውን ማሰሪያ እንኳ ልፈታ አይገባኝም።» ²⁸ይህ ሁሉ የሆነው ከዮርዳኖስ ወንዝ በስተ ምሥራቅ ባለችው በቢታንያ ነው፤ ዮሐንስ የሚያጠምቀው በዚያ ነበረ።^o

²⁹በማግሥቱ ዮሐንስ ኢየሱስ ወደ እርሱ ሲመጣ አየና እንዲህ አለ፦ «ተመልከቱ፤ የዓለምን ኃጢአት ተሸክሞ የሚያስወግደው የእግዚአብሔር በግ ይኸውና!^{p 30}ይህ እንዲህ ብዬ የተናገርኩለት ሰው ነው፦ “ከእኔ በኋላ የሚመጣ አንድ ሰው ከእኔ ይበልጣል፤ ከእኔ በፊት ነበረና።” ³¹እኔ ራሴ አላወቅኩትም ነበር፤ ነገር ግን እርሱ ለእስራኤል እንዲገለጥ በውኃ እያጠመቅኩ መጣሁ።» ³²ዮሐንስ ደግሞ እንዲህ ብሎ መሰከረ፦ «መንፈስ ከሰማይ እንደ ርግብ ወርዶ በእርሱ ላይ ሲኖር አየሁ። ³³እኔ ራሴ አላወቅኩትም ነበር፤ ነገር ግን በውኃ እንዳጠምቅ የላከኝ እንዲህ አለኝ፦ “መንፈስ ወርዶ በአንድ ሰው ላይ ሲኖር ስታይ፣ በመንፈስ ቅዱስ የሚያጠምቀው እርሱ ነው።” ³⁴እኔ አይቻለሁ፤ ይህም የእግዚአብሔር ምርጥ እንደ ሆነ መስክሬያለሁ።»^q

³⁵በማግሥቱ ዮሐንስ ከደቀ መዛሙርቱ ከሁለቱ ጋር እንደ ገና በዚያ ነበረ። ³⁶ኢየሱስ በዚያ ሲያልፍ አይቶ፦ «ተመልከቱ፤ የእግዚአብሔር በግ ይኸውና!» አለ። ³⁷ሁለቱ ደቀ መዛሙርት የተናገረውን ሰምተው ኢየሱስን ተከተሉት። ³⁸ኢየሱስ ዘወር ብሎ ሲከተሉት አያቸው። «ምን ትፈልጋላችሁ?» ብሎም ጠየቃቸው። እነርሱም፦ «ረቢ»፣ ትርጉሙ መምህር ማለት ነው፣ «የምትኖረው የት ነው?» አሉት። ³⁹«ኑ፤ ታያላችሁ» አላቸው። ስለዚህ ሄደው የሚኖርበትን አዩ፤ የዚያንም ቀን ቀሪ ጊዜ ከእርሱ ጋር ቆዩ። ሰዓቱም ከቀኑ አሥር ሰዓት ገደማ ነበረ።^{r 40}ዮሐንስ የተናገረውን ሰምተው ኢየሱስን ከተከተሉት ከሁለቱ አንዱ የስምዖን ጴጥሮስ ወንድም እንድርያስ ነበረ። ⁴¹እንድርያስ በመጀመሪያ ያደረገው ወንድሙን ስምዖንን ፈልጎ ማግኘት ነበረ፤ እንዲህም አለው፦ «መሲሕን አግኝተናል» (ይህም ክርስቶስ ማለት ነው)። ⁴²ስምዖንንም ወደ ኢየሱስ አመጣው። ኢየሱስም ትኩር ብሎ ተመለከተውና እንዲህ አለ፦ «አንተ የዮሐንስ ልጅ ስምዖን ነህ። ኬፋ ትባላለህ» (ትርጓሜውም ጴጥሮስ፣ ማለትም ዓለት ነው)።^s

⁴³በማግሥቱ ኢየሱስ ወደ ገሊላ ለመሄድ ወሰነ።^t ፊልጶስን አግኝቶ፦ «ተከተለኝ» አለው። ⁴⁴ፊልጶስ የእንድርያስና የጴጥሮስ የትውልድ ከተማ ከሆነችው ከቤተ ሳይዳ ነበረ። ⁴⁵ፊልጶስ ናትናኤልን አግኝቶ እንዲህ አለው፦ «ሙሴ በሕግ ስለ እርሱ ጽፏል፤ ነቢያትም ጽፈዋል፤ አሁን አግኝተነዋል፤ እርሱም የዮሴፍ ልጅ፣ የናዝሬቱ ኢየሱስ ነው።» ⁴⁶ናትናኤልም፦ «እንደ ናዝሬት ካለ ስፍራ በጎ ነገር ሊገኝ ይችላል?» ብሎ መለሰ። ፊልጶስም፦ «ና፤ እይ» አለው። ⁴⁷ኢየሱስ ናትናኤል ወደ እርሱ ሲመጣ አይቶ ስለ እርሱ እንዲህ አለ፦ «እውነተኛ እስራኤላዊ ይኸውና፤ በእርሱ ምንም ማታለል የለም።» ⁴⁸ናትናኤልም፦ «እንዴት ታውቀኛለህ?» ብሎ ጠየቀው። ኢየሱስም፦ «ፊልጶስ ከመጥራቱ በፊት ከበለስ ዛፍ በታች ሳለህ አየሁህ» ብሎ መለሰለት። ⁴⁹ናትናኤልም እንዲህ ብሎ መለሰ፦ «ረቢ፣ አንተ የእግዚአብሔር ልጅ ነህ፤ የእስራኤልም ንጉሥ አንተ ነህ!» ⁵⁰ኢየሱስም እንዲህ ብሎ መለሰ፦ «ከበለስ ዛፍ በታች እንዳየሁህ ስለ ነገርኩህ ታምናለህ? ከዚህ የሚበልጥ ነገር ታያለህ።» ⁵¹ከዚያም እንዲህ አለው፦ «እውነት እውነት እላችኋለሁ፤ ሁላችሁም ሰማይ ተከፍቶ ታያላችሁ፤ የእግዚአብሔር መላእክትም በሰው ልጅ ላይ እየወጡና እየወረዱ ታያላችሁ።»^u