Warumi 6

¹Basi, tuseme nini? Je, tubaki ndani ya dhambi, ili neema iongezeke zaidi? ²Hasha! Sisi ni watu walioifia dhambi; tungewezaje kuendelea kuishi ndani yake? ³Au hamjatambua kwamba kila mmoja wetu aliyebatizwa kuingia katika Kristo Yesu alibatizwa kuingia katika kifo chake? ⁴Basi kupitia ubatizo tulizikwa pamoja na yeye katika kifo, ili kama Kristo alivyofufuliwa kutoka kwa wafu kwa utukufu wa Baba, sisi pia tuishi maisha mapya.

⁵Kwa maana ikiwa tumekua na kuwa kitu kimoja na yeye katika mfano wa kifo chake, hakika tutakuwa kitu kimoja na yeye pia katika mfano wa ufufuo wake. ⁶Tunajua hili: nafsi yetu ya zamani ilipigiliwa msalabani pamoja na yeye, ili mwili wa dhambi unyang’anywe nguvu zake, nasi tusiwe tena watumwa wanaoitumikia dhambi. ⁷Kwa maana yeyote aliyekufa ametangazwa kuwa huru mbali na dhambi. ⁸Basi ikiwa tulikufa pamoja na Kristo, tunaamini kwamba tutashiriki pia uzima wake. ⁹Kwa maana tunajua kwamba Kristo, kwa kuwa amefufuliwa kutoka kwa wafu, hatakufa tena; kifo si bwana wake tena. ¹⁰Alipokufa, aliifia dhambi mara moja kwa daima; na sasa kwa kuwa yu hai, anaishi kwa ajili ya Mungu. ¹¹Vivyo hivyo, ninyi pia mnapaswa kujihesabu kuwa mmeifia dhambi, na kuwa mko hai kwa ajili ya Mungu katika Kristo Yesu.

¹²Basi msiiache dhambi itawale kama mfalme katika mwili wenu ambao utakufa, ikiwafanya mzitii tamaa za mwili huo. ¹³Msiendelee kuikabidhi dhambi viungo vya mwili wenu viwe silaha za udhalimu. Badala yake, jikabidhini kwa Mungu, kama watu waliokuwa wamekufa na sasa wako hai, na mkabidhini Mungu viungo vya mwili wenu viwe silaha za haki.^{a 14}Dhambi haitakuwa bwana wenu, kwa maana hamwishi chini ya sheria bali chini ya neema.

¹⁵Basi, ni nini? Je, basi tutende dhambi tu, kwa kuwa tunaishi chini ya neema na si chini ya sheria? Hasha! ¹⁶Hakika mnajua jambo hili: mkijiweka chini ya mtu kama watumwa, tayari kumtii, basi ninyi ni watumwa wa yule mnayemtii. Bwana huyo ni dhambi, inayoleta kifo, au ni utii, unaoleta haki. ¹⁷Lakini Mungu ashukuriwe! Zamani mlikuwa watumwa wa dhambi, lakini mkatii kwa moyo wote kielelezo cha mafundisho ambacho mlikabidhiwa kwacho ili kiwatunze. ¹⁸Mkiwa mmeachiliwa kutoka kwa dhambi, mkawa watumwa wa haki. ¹⁹Ninasema hivi kwa lugha ya kila siku ya kibinadamu kwa sababu ya udhaifu wenu wa kibinadamu. Kama vile zamani mlivyovikabidhi viungo vya mwili wenu viwe watumwa wa uchafu na wa uasi, jambo lililoleta uasi zaidi tu, vivyo hivyo sasa vikabidhini viwe watumwa wa haki, ili kuleta utakatifu.

²⁰Zamani dhambi ilipowamiliki kama watumwa, mlikuwa huru, kwa kadiri haki inavyohusika. ²¹Basi, mlipata tunda gani wakati ule kutokana na mambo ambayo sasa yanawatia aibu? Mambo hayo huishia katika kifo. ²²Sasa, hata hivyo, mkiwa huru kutoka kwa dhambi na mmefanywa watumwa wa Mungu, mna tunda linaloleta utakatifu, na matokeo yake ni uzima wa milele. ²³Ujira ambao dhambi hulipa ni kifo, lakini zawadi ya bure ya Mungu ni uzima wa milele katika Kristo Yesu Bwana wetu.