Warumi 5

¹Basi, kwa kuwa sasa tumehesabiwa haki kwa imani, tuna amani na Mungu kupitia Bwana wetu Yesu Kristo. ²Kupitia yeye pia tumeletwa kwa imani katika neema hii, ambamo sasa tumesimama, nasi tunajivunia tumaini la kushiriki utukufu wa Mungu.^{ab 3}Zaidi ya hayo, tunajivunia hata katika dhiki zetu, kwa sababu tunajua kwamba dhiki huleta uvumilivu, ⁴uvumilivu huleta tabia iliyojaribiwa na kuthibitika, na tabia hiyo huleta tumaini. ⁵Na tumaini hili halituachi na aibu, kwa maana Mungu ametupa Roho Mtakatifu, na kupitia Roho upendo wake umejaa tele mioyoni mwetu.

⁶Tulipokuwa bado hatuna nguvu, kwa wakati ambao Mungu alikuwa ameuchagua, Kristo alikufa kwa ajili ya wasiomcha Mungu. ⁷Ni nadra mtu kutoa uhai wake hata kwa ajili ya mtu mwenye haki; kwa ajili ya mtu mwema, labda, mtu anaweza kupata ujasiri wa kufa. ⁸Lakini Mungu anathibitisha jinsi anavyotupenda: Kristo alikufa kwa ajili yetu tulipokuwa bado wenye dhambi. ⁹Kwa kuwa sasa tumehesabiwa haki kwa damu yake, ni hakika zaidi kwamba tutaokolewa kupitia yeye kutoka katika ghadhabu ya Mungu. ¹⁰Tulikuwa maadui wa Mungu wakati kifo cha Mwana wake kilipotupatanisha naye. Sasa kwa kuwa tumepatanishwa, ni hakika zaidi kwamba tutaokolewa kwa uzima wa Mwana. ¹¹Zaidi ya hayo, tunajivunia Mungu kupitia Bwana wetu Yesu Kristo. Kupitia yeye upatanisho huu sasa ni wetu.

¹²Kwa hiyo, kama vile dhambi ilivyoingia ulimwenguni kupitia mtu mmoja, na kifo kikaja kwa sababu ya dhambi, na hivyo kifo kikaenea kwa watu wote kwa kuwa wote walitenda dhambi— ¹³kwa maana dhambi ilikuwa tayari ulimwenguni kabla sheria haijatolewa, lakini mahali pasipo na sheria, dhambi haiandikwi katika hesabu. ¹⁴Hata hivyo, kifo kilitawala tangu Adamu mpaka Musa, hata juu ya watu ambao dhambi yao haikuwa kama ya Adamu, aliyevunja agizo. Naye Adamu ni kielelezo cha yule ambaye angekuja.^c

¹⁵Lakini lile kosa na karama ya bure havifanani. Ikiwa wengi walikufa kwa sababu ya kosa la mtu mmoja, basi zaidi sana neema ya Mungu imewafurikia wale wengi, pamoja na zawadi iliyotolewa kwa neema ya mtu yule mmoja, Yesu Kristo. ¹⁶Wala zawadi hiyo si kama kile kilichokuja kupitia yule mtu mmoja aliyetenda dhambi. Hukumu ilifuata kosa moja ikaleta adhabu, lakini karama ya bure ilifuata makosa mengi ikaleta kutangazwa bila hatia. ¹⁷Ikiwa kifo kilitawala kupitia mtu mmoja kwa sababu ya kosa la mtu huyo mmoja, ni hakika zaidi sana kwamba wale wanaopokea neema kwa kipimo kamili na zawadi ya haki watatawala katika uzima kupitia mtu yule mmoja, Yesu Kristo.

¹⁸Basi, kama kosa moja lilileta adhabu kwa watu wote, vivyo hivyo tendo moja la haki linaleta kwa watu wote kuhesabiwa haki na kupewa uzima.^{d 19}Kwa maana kutotii kwa mtu mmoja kuliwafanya wale wengi kuwa wenye dhambi, na vivyo hivyo utii wa yule mmoja utawafanya wale wengi kuwa wenye haki. ²⁰Sheria ilikuja kama nyongeza, ili kosa liongezeke. Lakini dhambi ilipoongezeka, neema ilifurika kupita kiasi, ²¹ili, kama dhambi ilivyoshika utawala wake kupitia kifo, neema nayo itawale kupitia haki na kuongoza hadi uzima wa milele kupitia Yesu Kristo Bwana wetu.