Warumi 7

¹Hakika mnaelewa, ndugu, kwa kuwa nasema na watu wanaoijua sheria, kwamba sheria ina mamlaka juu ya mtu wakati tu mtu huyo yu hai. ²Chukua mfano wa mwanamke aliyeolewa: sheria inamfunga kwa mumewe wakati mume huyo yu hai. Lakini mume akifa, yeye anawekwa huru kutoka katika sheria iliyomfunga kwake. ³Kwa hiyo, akijiunga na mwanamume mwingine wakati mumewe bado yu hai, watu watamwita mzinzi. Lakini mumewe akishakufa, yu huru kutoka katika sheria, na kuolewa na mwanamume mwingine hakumfanyi kuwa mzinzi.

⁴Ndivyo ilivyo kwenu pia, ndugu zangu. Kupitia mwili wa Kristo, ninyi mliuawa kwa upande wa sheria, ili muweze kuunganishwa na mwingine, yaani yule aliyefufuliwa kutoka kwa wafu. Na hivyo tunaweza kumzalia Mungu matunda. ⁵Tulipotawaliwa na asili ya dhambi, sheria iliamsha ndani yetu tamaa za dhambi. Zilifanya kazi katika viungo vya miili yetu, na yale tuliyozaa yalikuwa mali ya kifo. ⁶Lakini sasa tuko huru kutoka katika sheria. Tumekufa kwa kile kilichotushika kwa nguvu, ili tutumikie katika maisha mapya ya Roho, si katika maisha ya zamani ya sheria iliyoandikwa.

⁷Tuseme nini basi? Je, sheria ni dhambi? Hasha! Lakini ni sheria iliyonifundisha dhambi ni nini. Nisingaliweza kamwe kuitambua tamaa mbaya jinsi ilivyo kama sheria isingalisema, “Usitamani.”^{a 8}Dhambi ilipata nafasi yake katika amri, ikaitumia kuamsha ndani yangu kila aina ya tamaa mbaya, kwa maana bila sheria dhambi imekufa. ⁹Kulikuwa na wakati nilipoishi bila sheria. Kisha amri ikaja, dhambi ikaamka na kupata uhai, ¹⁰nami nikafa. Amri ilitolewa kwa ajili ya uzima, lakini kwangu ilileta kifo. ¹¹Dhambi ilipata nafasi yake katika amri, ikanidanganya, ikaitumia amri hiyo kuniua. ¹²Basi, sheria ni takatifu. Amri nayo ni takatifu, ya haki na njema.

¹³Je, basi, kitu kizuri kiligeuka kuwa kifo kwangu? Hasha! Dhambi ndiyo iliyosababisha. Ilikitumia kilicho chema kuleta kifo ndani yangu, ili dhambi ionekane jinsi ilivyo hasa. Kupitia amri, dhambi ilijionyesha kuwa ovu kupita kipimo chochote.

¹⁴Tunajua kwamba sheria ni ya kiroho. Lakini mimi ni wa mwili, na nimeuzwa kwa dhambi niwe mtumwa wake.^{b 15}Ninachofanya hakinieleweki. Mambo ninayotaka kuyafanya, siyafanyi; mambo ninayoyachukia ndiyo ninayoishia kuyafanya. ¹⁶Lakini ikiwa ninafanya mambo nisiyotaka kuyafanya, hilo linaonyesha kwamba niko upande wa sheria: ninakubali kwamba ni njema. ¹⁷Ikiwa ndivyo, mimi si yule anayelitenda tena; ni dhambi, dhambi ambayo imejifanyia makao ndani yangu. ¹⁸Ninajua kwamba hakuna jema linalokaa ndani yangu, yaani, katika asili yangu ya dhambi. Kutaka jema kumo ndani ya uwezo wangu; kulitenda hakumo. ¹⁹Sitendi jema ninalolitaka, na baya nisilolitaka ndilo ninalolitekeleza. ²⁰Lakini ikiwa ninafanya nisichokitaka, basi mimi si yule anayekifanya tena; ni dhambi, dhambi ambayo imejifanyia makao ndani yangu.

²¹Basi, hii ndiyo sheria ninayoigundua: kila ninapokusudia kutenda lililo jema, ubaya tayari uko kando yangu.^{c 22}Katika utu wangu wa ndani ninakubaliana kwa furaha na sheria ya Mungu. ²³Lakini ninaona sheria nyingine katika viungo vya mwili wangu. Inapigana vita na sheria ya akili yangu, na inanichukua mateka kwa sheria ya dhambi iliyomo katika viungo hivyo vya mwili wangu. ²⁴Mimi ni mtu mnyonge kama nini! Ni nani atakayeniweka huru kutoka katika mwili huu wa kifo? ²⁵Mungu ashukuriwe kupitia Yesu Kristo Bwana wetu!^d

Basi, mimi mwenyewe ninaitumikia sheria ya Mungu kwa akili yangu, lakini kwa asili yangu ya dhambi ninaitumikia sheria ya dhambi.