ማቴዎስ 2

¹ኢየሱስ በይሁዳ ቤተ ልሔም የተወለደው ንጉሥ ሄሮድስ በነገሠበት ዘመን ነበር። በዚያን ጊዜ ሰብአ ሰገል ከምሥራቅ ወደ ኢየሩሳሌም መጥተው ²እንዲህ ሲሉ ጠየቁ፦ «አዲስ የተወለደው የአይሁድ ንጉሥ የት ነው?^a ኮከቡ ሲወጣ አይተናል፤ ልንሰግድለትም መጥተናል።»^{bc 3}ንጉሥ ሄሮድስ ይህን በሰማ ጊዜ ተሸበረ፤ የኢየሩሳሌም ሕዝብም ሁሉ እንደዚሁ ተሸበረ። ⁴እርሱም የካህናት አለቆችንና የሕዝቡን የሕግ መምህራን ሁሉ በአንድነት ጠርቶ ክርስቶስ የሚወለደው የት እንደ ሆነ ጠየቃቸው። ⁵«በይሁዳ ቤተ ልሔም» አሉት፤ «ምክንያቱም ነቢዩ እንዲህ ብሎ ጽፏል፦ ⁶“በይሁዳ ምድር ያለሽ ቤተ ልሔም ሆይ፣ ከይሁዳ ዋና ዋና ከተሞች መካከል ከቶ ታናሽ አይደለሽም፤ ከአንቺ መሪ ይወጣልና፤ እርሱም ለሕዝቤ ለእስራኤል እረኛ ይሆናል።”»

⁷ከዚያም ሄሮድስ ሰብአ ሰገልን በግል አስጠርቶ ኮከቡ የታየበትን ትክክለኛ ጊዜ ከእነርሱ ጠይቆ ተረዳ። ⁸ወደ ቤተ ልሔምም ሲልካቸው እንዲህ አላቸው፦ «ሂዱና ስለ ሕፃኑ የምትችሉትን ሁሉ በሚገባ አጣሩ። ባገኛችሁትም ጊዜ እኔም መጥቼ እንድሰግድለት መልእክት ላኩልኝ።» ⁹እነርሱም ንጉሡን ካዳመጡ በኋላ ጉዟቸውን ቀጠሉ። ሲወጣ ያዩት ኮከብም ከፊታቸው ይሄድ ነበር፤ መጥቶም ሕፃኑ ባለበት ስፍራ ላይ ቆመ። ¹⁰ኮከቡን ሲያዩ ልባቸው እጅግ ታላቅ በሆነ ደስታ ተሞላ። ¹¹ወደ ቤቱ ሲገቡ ሕፃኑን ከእናቱ ከማርያም ጋር አገኙት። በግንባራቸው ተደፍተውም ሰገዱለት፤ የሀብት ሣጥኖቻቸውንም ከፍተው ወርቅ፣ ዕጣንና ከርቤ ስጦታ አቀረቡለት። ¹²ወደ ሄሮድስ እንዳይመለሱ በሕልም ማስጠንቀቂያ ስለ ተሰጣቸው፣ በሌላ መንገድ ወደ አገራቸው ተመለሱ።

¹³ሰብአ ሰገል ከሄዱ በኋላ የጌታ መልአክ ለዮሴፍ በሕልም ታየውና እንዲህ አለው፦ «ተነሥና ሕፃኑንና እናቱን ይዘህ ወደ ግብፅ ሽሽ። ሄሮድስ ሕፃኑን ፈልጎ ሊያጠፋው አስቧልና እኔ እስክነግርህ ድረስ በዚያው ቆይ።» ¹⁴ዮሴፍም ተነሥቶ ገና ሌሊት ሳለ ሕፃኑንና እናቱን ይዞ ወደ ግብፅ ሄደ። ¹⁵ሄሮድስ እስኪሞትም ድረስ በዚያ ኖረ። ይህም የሆነው ጌታ በነቢዩ አማካይነት የተናገረው ቃል እንዲፈጸም ነው፦ «ልጄን ከግብፅ ጠራሁት።»

¹⁶ሄሮድስ ሰብአ ሰገል እንዳሞኙት ባየ ጊዜ በጣም ተናደደ። ወታደሮችንም ልኮ በቤተ ልሔምና በአካባቢዋ የነበሩትን ዕድሜያቸው ሁለት ዓመትና ከዚያ በታች የሆኑትን ወንዶች ልጆች ሁሉ አስገደለ፤ ይህንም ያደረገው ከሰብአ ሰገል በተረዳው ጊዜ መሠረት ነው። ¹⁷በዚያን ጊዜ በነቢዩ በኤርምያስ አማካይነት የተነገረው ቃል ተፈጸመ፦ ¹⁸«በራማ ድምፅ ተሰማ፤ ለቅሶና ከፍተኛ ዋይታ ነው። ራሔል ለልጆቿ ታለቅሳለች፤ መጽናናትንም ሁሉ እምቢ ትላለች፤ ልጆቿ የሉምና።»

¹⁹ሄሮድስ ከሞተ በኋላ የጌታ መልአክ በግብፅ ለነበረው ለዮሴፍ በሕልም ታየው፤ ²⁰እንዲህም አለው፦ «ተነሥ፤ ሕፃኑንና እናቱን ይዘህ ወደ እስራኤል ምድር ተመለስ፤ የሕፃኑን ሞት የፈለጉት ሞተዋልና።» ²¹ዮሴፍም ተነሥቶ ሕፃኑንና እናቱን ይዞ ወደ እስራኤል ምድር ገባ። ²²ነገር ግን አርኬላዎስ አባቱን ሄሮድስን ተክቶ በይሁዳ ላይ እንደ ነገሠ በሰማ ጊዜ ወደዚያ ለመሄድ ፈራ። በሕልም ማስጠንቀቂያ ስለ ተሰጠውም ወደ ገሊላ አውራጃ ሄደ፤ ²³ናዝሬት በምትባል ከተማም መኖሪያውን አደረገ። ይህም የሆነው ነቢያት ናዝራዊ ይባላል ብለው የተናገሩት እንዲፈጸም ነው።^d