ማቴዎስ 3

¹በዚያ ዘመን መጥምቁ ዮሐንስ በይሁዳ ምድረ በዳ መልእክት ይዞ ተገለጠ። ²«ንስሓ ግቡ» እያለ ያውጅ ነበር፤ «መንግሥተ ሰማያት ቀርባለች።» ³ዮሐንስ ነቢዩ ኢሳይያስ እንዲህ ብሎ የተናገረለት ሰው ነው፦ «በምድረ በዳ እንዲህ ብሎ የሚጣራ ድምፅ አለ፦ “የጌታን መንገድ አዘጋጁ፤ የሚጓዝባቸውንም መንገዶች አቅኑ።”» ⁴ዮሐንስ ራሱ ከግመል ጠጉር የተሠራ ልብስ ይለብስ ነበር፤ በወገቡም የቆዳ ቀበቶ ይታጠቅ ነበር፤ አንበጣና የዱር ማርም ይመገብ ነበር። ⁵ከኢየሩሳሌም፣ ከይሁዳ ሁሉና በዮርዳኖስ ዳር ካለው አገር ሁሉ ብዙ ሕዝብ ወደ እርሱ ይጎርፍ ነበር። ⁶ኃጢአታቸውንም ይናዘዙ ነበር፤ እርሱም በዮርዳኖስ ወንዝ ያጠምቃቸው ነበር።

⁷ዮሐንስ ግን ብዙ ፈሪሳውያንና ሰዱቃውያን ለመጠመቅ ሲመጡ ባየ ጊዜ እንዲህ አላቸው፦ «እናንተ የእባብ ዘሮች! ከሚመጣው ቁጣ እንድታመልጡ ማን አስጠነቀቃችሁ? ⁸ስለዚህ ንስሓችሁ እውነተኛ መሆኑን የሚያሳይ ፍሬ አፍሩ። ⁹“አባታችን አብርሃም ነው” እያላችሁ ራሳችሁን ለማጽናናት አታስቡ። እላችኋለሁ፣ እግዚአብሔር ከእነዚህ ድንጋዮች ለአብርሃም ልጆችን ማስገኘት ይችላል። ¹⁰መጥረቢያው አሁን እንኳ በዛፎቹ ሥር ላይ ተደግኗል። መልካም ፍሬ የማይሰጥ ዛፍ ሁሉ ተቆርጦ ወደ እሳት ይጣላል።

¹¹እኔ ለንስሓ በውኃ አጠምቃችኋለሁ። ነገር ግን ከእኔ በኋላ የሚመጣው ከእኔ እጅግ የሚበልጥ ኃያል ነው፤ እኔ ጫማውን እንኳ ለመሸከም አልበቃም። እርሱ በመንፈስ ቅዱስና በእሳት ያጠምቃችኋል።^{a 12}መንሹን በእጁ ይዟል፤ አውድማውንም ያጸዳል። ስንዴውን በጎተራው ያከማቻል፤ ገለባውን ግን ሊጠፋ በማይችል እሳት ያቃጥላል።»

¹³ከዚያም ኢየሱስ ከገሊላ ወደ ዮርዳኖስ መጥቶ በዮሐንስ ለመጠመቅ ወደ እርሱ ቀረበ። ¹⁴ዮሐንስ ግን ሊያግደው ሞከረ። «በአንተ መጠመቅ የሚያስፈልገኝ እኔ ነኝ» አለው፤ «ታዲያ አንተ ወደ እኔ ትመጣለህ?» ¹⁵ኢየሱስ ግን እንዲህ ሲል መለሰለት፦ «ለጊዜው ይሁን፤ ጽድቅን ሁሉ ለመፈጸም ለእኛ ተገቢው መንገድ ይህ ነው።»^b ከዚያም ዮሐንስ እንዲጠመቅ ፈቀደለት። ¹⁶ኢየሱስ ተጠምቆ ወዲያውኑ ከውኃው ወጣ። ድንገትም ሰማይ ተከፈተ፤ የእግዚአብሔርም መንፈስ እንደ ርግብ ወርዶ በእርሱ ላይ ሲያርፍ አየ። ¹⁷ከሰማይም እንዲህ የሚል ድምፅ ተሰማ፦ «እጅግ የምወደው ልጄ ይህ ነው፤ በእርሱም ደስ ይለኛል።»^c