ማቴዎስ 19

¹ኢየሱስ ይህን ተናግሮ ከጨረሰ በኋላ ከገሊላ ተነሥቶ በዮርዳኖስ ማዶ ወዳለው ወደ ይሁዳ አገር ሄደ። ²ብዙ ሕዝብ ተከተሉት፤ በዚያም ፈወሳቸው።

³አንዳንድ ፈሪሳውያን ሊፈትኑት ወደ እርሱ መጡ። «ሰው በማንኛውም ምክንያት ሚስቱን እንዲፈታ ሕጉ ይፈቅድለታል?» ብለው ጠየቁት። ⁴ኢየሱስም እንዲህ ብሎ መለሰ፦ «ፈጣሪ በመጀመሪያ ወንድና ሴት አድርጎ እንደ ፈጠራቸው አላነበባችሁም? ⁵እንዲህም አለ፦ “ስለዚህ ሰው አባቱንና እናቱን ትቶ ከሚስቱ ጋር ይጣበቃል፤ ሁለቱም አንድ ሥጋ ይሆናሉ።” ⁶ስለዚህ ከእንግዲህ ሁለት አይደሉም፤ አንድ ሥጋ ናቸው። እንግዲያውስ እግዚአብሔር በአንድ ቀንበር ያጣመረውን ማንም ሰው አይለየው።» ⁷እነርሱም እንዲህ አሉት፦ «ታዲያ ሙሴ ሰው ለሚስቱ የፍቺ ደብዳቤ ጽፎ ሰጥቶ እንዲያሰናብታት ለምን አዘዘ?» ⁸ኢየሱስም እንዲህ ብሎ መለሰ፦ «ሙሴ ሚስቶቻችሁን እንድትፈቱ የፈቀደላችሁ ልባችሁ ደንዳና ስለ ሆነ ነው። ከመጀመሪያው ግን ነገሩ እንዲህ አልነበረም። ⁹እኔ ግን እላችኋለሁ፤ ከዝሙት በቀር በሌላ ምክንያት ሚስቱን ፈትቶ ሌላ ሴት የሚያገባ ሰው ያመነዝራል፤ የተፈታችውን ሴት የሚያገባም ያመነዝራል።»^ab

¹⁰ደቀ መዛሙርቱም እንዲህ አሉት፦ «በባልና በሚስት መካከል ያለው ነገር እንዲህ ከሆነ ጭራሹን አለማግባት ይሻላል።» ¹¹እርሱም እንዲህ ብሎ መለሰላቸው፦ «ይህን አባባል ሁሉም ሊቀበለው አይችልም። ሊቀበሉት የሚችሉት የተሰጣቸው ብቻ ናቸው።^{c 12}ምክንያቱም አንዳንዶች ጃንደረቦች ሆነው ተወልደዋል፤ አንዳንዶች በሌሎች ሰዎች ጃንደረቦች ተደርገዋል፤ አንዳንዶችም ስለ መንግሥተ ሰማያት ራሳቸውን ጃንደረቦች አድርገዋል።^d ይህን ሊቀበል የሚችል ሁሉ ይቀበለው።»

¹³ከዚህ በኋላ እጆቹን እንዲጭንባቸውና እንዲጸልይላቸው አንዳንድ ሰዎች ትንንሽ ልጆችን ወደ ኢየሱስ አመጡ። ደቀ መዛሙርቱ ግን ሰዎቹን ገሠጹአቸው። ¹⁴ኢየሱስም እንዲህ አለ፦ «ልጆቹን ተዉአቸው። ወደ እኔ እንዳይመጡ አትከልክሏቸው፤ መንግሥተ ሰማያት እንደ እነርሱ ላሉት ናትና።» ¹⁵እጆቹንም በላያቸው ጫነ፤ ከዚያም ተነሥቶ ሄደ።

¹⁶ከዚያም አንድ ሰው ወደ ኢየሱስ ቀርቦ እንዲህ ብሎ ጠየቀው፦ «መምህር ሆይ፣ የዘላለም ሕይወትን ለማግኘት ምን መልካም ነገር ማድረግ አለብኝ?» ¹⁷ኢየሱስም እንዲህ ብሎ መለሰለት፦ «ስለ መልካም ነገር ለምን ትጠይቀኛለህ?^e መልካም የሆነ አንድ ብቻ ነው። ወደ ሕይወት ልትገባ ብትፈልግ ትእዛዛትን ጠብቅ።» ¹⁸«የትኞቹን?» ብሎ ሰውየው ጠየቀ። ኢየሱስም እንዲህ አለ፦ «“አትግደል፤ አታመንዝር፤ አትስረቅ፤ በሐሰት አትመስክር፤ ¹⁹አባትህንና እናትህን አክብር”፤ እንዲሁም “ባልንጀራህን እንደ ራስህ አድርገህ ውደድ።”» ²⁰ወጣቱም እንዲህ አለው፦ «እነዚህን ሁሉ ጠብቄአለሁ። ገና የጎደለኝ ምንድን ነው?» ²¹ኢየሱስም እንዲህ አለው፦ «ፍጹም መሆን ትፈልጋለህ? እንግዲያውስ ሂድ፤ ንብረትህን ሽጠህ ገንዘቡን ለድሆች ስጥ፤ በሰማይም ሀብት ይኖርሃል። ከዚያም መጥተህ ተከተለኝ።» ²²ወጣቱ ይህን በሰማ ጊዜ እያዘነ ሄደ፤ ብዙ ንብረት ነበረውና።

²³ከዚያም ኢየሱስ ደቀ መዛሙርቱን እንዲህ አላቸው፦ «እውነት እላችኋለሁ፣ ሀብታም ሰው ወደ መንግሥተ ሰማያት መግባት ይከብደዋል። ²⁴ደግሞ እላችኋለሁ፤ ሀብታም ሰው ወደ እግዚአብሔር መንግሥት ከሚገባ ይልቅ ግመል በመርፌ ቀዳዳ ማለፉ ይቀላል።»^{f 25}ደቀ መዛሙርቱ ይህን ሲሰሙ እጅግ ተገረሙ። «እንግዲያስ ማን ሊድን ይችላል?» ብለው ጠየቁ። ²⁶ኢየሱስም ትኩር ብሎ ተመለከታቸውና እንዲህ አለ፦ «ይህ ለሰዎች የማይቻል ነው፤ ለእግዚአብሔር ግን ሁሉ ይቻላል።»

²⁷በዚያን ጊዜ ጴጥሮስ መልሶ፦ «እኛ ሁሉን ትተን ተከተልንህ» አለው። «ታዲያ ምን እናገኛለን?» ²⁸ኢየሱስም እንዲህ አላቸው፦ «እውነት እላችኋለሁ፣ ሁሉ ነገር አዲስ በሚሆንበትና የሰው ልጅ በክብሩ ዙፋን ላይ በሚቀመጥበት ጊዜ፣ እናንተ የተከተላችሁኝ ደግሞ በአሥራ ሁለት ዙፋኖች ላይ ተቀምጣችሁ በአሥራ ሁለቱ የእስራኤል ነገዶች ላይ ትፈርዳላችሁ። ²⁹ስለ ስሜ ብሎ ቤቶችን፣ ወይም ወንድሞችን ወይም እኅቶችን፣ ወይም አባትን ወይም እናትን፣ ወይም ሚስትን ወይም ልጆችን፣ ወይም እርሻዎችን የተወ ሁሉ መቶ እጥፍ ይከፈለዋል፤ የዘላለምንም ሕይወት ይወርሳል። ³⁰ነገር ግን አሁን ፊተኞች የሆኑ ብዙዎች ኋለኞች ይሆናሉ፤ ኋለኞቹም ፊተኞች ይሆናሉ።