ማቴዎስ 16

¹ፈሪሳውያንና ሰዱቃውያን ኢየሱስን ሊፈትኑት መጡ፤ ከሰማይም ምልክት እንዲያሳያቸው ጠየቁት። ²እርሱም እንዲህ ሲል መለሰላቸው፦ «ማታ ሲሆን፦ “ሰማዩ ስለ ቀላ መልካም አየር ይሆናል” ትላላችሁ።^{a 3}በማለዳም፦ “ሰማዩ ቀልቶ ስለ ጠቆረ ዛሬ አውሎ ነፋስ ይሆናል” ትላላችሁ። የሰማዩን ገጽታ ማንበብ ታውቃላችሁ፤ የዘመኑን ምልክቶች ግን ማንበብ አትችሉም።

⁴ክፉና ታማኝነት የጎደለው ትውልድ ምልክት ይፈልጋል፤ የሚሰጠው ምልክት ግን የዮናስ ምልክት ብቻ ነው።» ከዚያም ትቷቸው ሄደ።

⁵ደቀ መዛሙርቱ ወደ ሐይቁ ማዶ በደረሱ ጊዜ ዳቦ መያዝ እንደ ረሱ አወቁ። ⁶ኢየሱስም እንዲህ አላቸው፦ «ዓይናችሁን ክፈቱ፤ ከፈሪሳውያንና ከሰዱቃውያን እርሾ ራሳችሁን ጠብቁ።» ⁷እነርሱም በመካከላቸው ተነጋገሩበት፤ እንዲህም አሉ፦ «ይህን የሚለው ዳቦ ስላልያዝን ነው።» ⁸ኢየሱስ የሚሉትን አውቆ እንዲህ አለ፦ «እናንተ እምነታችሁ እንዲህ ትንሽ የሆነ፣ ዳቦ ስለሌላችሁ በመካከላችሁ ለምን ትነጋገራላችሁ? ⁹አሁንም አታስተውሉም? ለአምስቱ ሺህ ሰዎች የበቁትን አምስቱን ዳቦ፣ ስንት ቅርጫትም ሙሉ እንደ ሰበሰባችሁ ረሳችሁን? ¹⁰ወይስ ለአራቱ ሺህ ሰዎች የበቁትን ሰባቱን ዳቦ፣ ስንት ትልልቅ ቅርጫትም ሙሉ እንደ ሰበሰባችሁ ረሳችሁን? ¹¹ስለ ዳቦ እንዳልተናገርኩ እንዴት አትገነዘቡም? እላችኋለሁ፤ ከፈሪሳውያንና ከሰዱቃውያን እርሾ ራሳችሁን ጠብቁ።» ¹²ያን ጊዜ ያስጠነቀቃቸው ከፈሪሳውያንና ከሰዱቃውያን ትምህርት እንጂ ዳቦ ከሚጋገርበት እርሾ እንዳልሆነ ተገነዘቡ።

¹³ኢየሱስ ቂሣርያ ፊልጶስ ወደምትባለው አካባቢ በደረሰ ጊዜ ደቀ መዛሙርቱን እንዲህ ብሎ ጠየቃቸው፦ «ሰዎች የሰው ልጅ ማን ነው ይላሉ?» ¹⁴እነርሱም እንዲህ ብለው መለሱ፦ «አንዳንዶች መጥምቁ ዮሐንስ ነው ይላሉ፤ ሌሎች ኤልያስ ነው ይላሉ፤ ሌሎች ደግሞ ኤርምያስ ወይም ከነቢያት አንዱ ነው ይላሉ።» ¹⁵ከዚያም እንዲህ ሲል ጠየቃቸው፦ «እናንተስ እኔ ማን እንደ ሆንኩ ትላላችሁ?» ¹⁶ስምዖን ጴጥሮስም እንዲህ ብሎ መለሰ፦ «አንተ ክርስቶስ፣ የሕያው እግዚአብሔር ልጅ ነህ።» ¹⁷ኢየሱስም እንዲህ ሲል መለሰለት፦ «የዮና ልጅ ስምዖን፣ የተባረክ ነህ! ይህን የገለጠልህ ሰው አይደለም፤ በሰማይ ያለው አባቴ ነው። ¹⁸እኔም እልሃለሁ፤ አንተ ጴጥሮስ ነህ፤ በዚህም ዓለት ላይ ቤተ ክርስቲያኔን እሠራለሁ። የሲኦል ደጆች አያሸንፏትም።^{b 19}የመንግሥተ ሰማያትን ቁልፎች እሰጥሃለሁ፤ በምድር ያሰርከው በሰማይ የታሰረ ይሆናል፤ በምድር የፈታኸውም በሰማይ የተፈታ ይሆናል።»^{cd 20}ከዚያም እርሱ ክርስቶስ መሆኑን ለማንም እንዳይናገሩ ደቀ መዛሙርቱን አጥብቆ አዘዛቸው።

²¹ከዚያን ጊዜ ጀምሮ ኢየሱስ ወደ ኢየሩሳሌም መሄድ እንዳለበት ለደቀ መዛሙርቱ በግልጽ ማሳየት ጀመረ። በዚያም ከሽማግሌዎች፣ ከካህናት አለቆችና ከሕግ መምህራን ብዙ መከራ ይቀበላል፤ ይገደላል፤ በሦስተኛውም ቀን ይነሣል። ²²ጴጥሮስ ለብቻው ወስዶት ይቃወመው ጀመር። «ጌታ ሆይ፣ እግዚአብሔር ያርቀው!» አለ። «እንዲህ ያለ ነገር ከቶ አይደርስብህም!» ²³ኢየሱስም ዘወር ብሎ ጴጥሮስን እንዲህ አለው፦ «ሰይጣን ሆይ፣ ከኋላዬ ሂድ! በመንገዴ ላይ ማሰናከያ ሆነህብኛል። ሐሳብህ በእግዚአብሔር ዓላማ ላይ ሳይሆን በሰው ዓላማ ላይ ነው።»

²⁴ከዚያም ኢየሱስ ደቀ መዛሙርቱን እንዲህ አላቸው፦ «ከኋላዬ ሊመጣ የሚፈልግ ሁሉ ራሱን ይካድ፤ መስቀሉንም ተሸክሞ ይከተለኝ። ²⁵ሕይወቱን ለማዳን የሚፈልግ ሁሉ ያጣታል፤ ስለ እኔ ብሎ ሕይወቱን የሚያጣ ሁሉ ግን ያገኛታል። ²⁶አንድ ሰው ዓለምን ሁሉ አግኝቶ ሕይወቱን ቢያጣ እንበል። ይህ ምን ይጠቅመዋል? ወይስ ሰው ሕይወቱን መልሶ ለመግዛት ምን ሊሰጥ ይችላል? ²⁷የሰው ልጅ ከመላእክቱ ጋር በአባቱ ክብር ሊመጣ ነውና፤ በዚያን ጊዜም ለእያንዳንዱ ሰው እንደ ሥራው ይከፍለዋል። ²⁸እውነት እላችኋለሁ፣ እዚህ ከቆሙት መካከል የሰው ልጅ በመንግሥቱ ሲመጣ ሳያዩ ሞትን የማይቀምሱ አንዳንዶች አሉ።»^e