ማቴዎስ 23

¹በዚያን ጊዜ ኢየሱስ ለሕዝቡና ለደቀ መዛሙርቱ እንዲህ አለ፦ ²«የሕግ መምህራንና ፈሪሳውያን በሙሴ ወንበር ተቀምጠዋል። ³ስለዚህ የሚነግሯችሁን ሁሉ በተግባር ፈጽሙ፤ ጠብቁትም። ነገር ግን እነርሱ የሚያደርጉትን አትከተሉ፤ የሚያስተምሩትን ራሳቸው አይኖሩበትምና።^{a 4}ከባድ ሸክሞችን አስረው በሌሎች ሰዎች ትከሻ ላይ ይከምራሉ፤ ራሳቸው ግን እነዚያን ሸክሞች በአንድ ጣት እንኳ ለማንቀሳቀስ እምቢ ይላሉ። ⁵ሥራቸውን ሁሉ የሚያደርጉት ሰዎች እንዲያዩአቸው ነው። ክታቦቻቸውን ያሰፋሉ፤ የልብሳቸውንም ዘርፍ ያስረዝማሉ። ⁶በግብዣ የክብር ቦታን፣ በምኩራቦችም የፊት ወንበሮችን ይወዳሉ፤ ⁷በገበያ ቦታዎች የአክብሮት ሰላምታ ሲቀርብላቸውና ሰዎች “ረቢ” ብለው ሲጠሯቸውም ደስ ይላቸዋል። ⁸እናንተ ግን ማንም “ረቢ” ብሎ እንዲጠራችሁ አትፍቀዱ። መምህራችሁ አንድ ብቻ ነው፤ ሁላችሁም በአንድነት ወንድሞችና እኅቶች ናችሁ። ⁹በምድር ላይም ማንንም “አባት” ብላችሁ የማዕረግ ስም አትስጡ፤ አባታችሁ አንድ ነው፤ እርሱም በሰማይ ያለው ነው። ¹⁰ደግሞም መሪዎች ተብላችሁ አትጠሩ፤ መሪያችሁ አንድ ነው፤ እርሱም ክርስቶስ ነው። ¹¹ከእናንተ መካከል ታላቅ የሆነ እናንተን የሚያገለግል ይሆናል። ¹²ራሳቸውን ከፍ የሚያደርጉ ዝቅ ይደረጋሉ፤ ራሳቸውን ዝቅ የሚያደርጉም ከፍ ይደረጋሉ።

¹³እናንተ የሕግ መምህራንና ፈሪሳውያን፣ እናንተ ግብዞች፣ ወዮላችሁ! ሰዎች እንዳይገቡ የመንግሥተ ሰማያትን መንገድ ትዘጋላችሁ። እናንተ ራሳችሁ አትገቡም፤ ሌሎች ሊገቡ ሲሉም ትከለክሏቸዋላችሁ።^b

¹⁵እናንተ የሕግ መምህራንና ፈሪሳውያን፣ እናንተ ግብዞች፣ ወዮላችሁ! አንድን ሰው ወደ ሃይማኖታችሁ ለመመለስ ባሕርንና የብስን ታቋርጣላችሁ። ከተመለሰም በኋላ ከእናንተ ይበልጥ እጥፍ ለገሃነም የተገባ ታደርጉታላችሁ።

¹⁶እናንተ ዕውሮች መሪዎች፣ ወዮላችሁ! የምታስተምሩት ይህ ነው፦ “በቤተ መቅደስ መማል ምንም አይቆጠርም። በቤተ መቅደሱ ወርቅ ብትምል ግን መሐላህን መፈጸም አለብህ።” ¹⁷ሞኞችና ዕውሮች! ታዲያ የሚበልጠው የትኛው ነው፦ ወርቁ ወይስ ወርቁን ቅዱስ አድርጎ የለየው ቤተ መቅደሱ? ¹⁸ደግሞም እንዲህ ታስተምራላችሁ፦ “በመሠዊያው መማል ምንም አይቆጠርም። በላዩ ባለው መባ ብትምል ግን መሐላህን መፈጸም አለብህ።” ¹⁹ምንኛ ዕውሮች ናችሁ! የሚበልጠው የትኛው ነው፦ መባው ወይስ መባውን ቅዱስ አድርጎ የሚለየው መሠዊያው? ²⁰ስለዚህ በመሠዊያው የሚምል ሁሉ በመሠዊያውና በላዩ ባለው ነገር ሁሉ ይምላል። ²¹በቤተ መቅደስም የሚምል ሁሉ በቤተ መቅደሱና በዚያ በሚኖረው ይምላል። ²²በሰማይም የሚምል ሁሉ በእግዚአብሔር ዙፋንና በላዩ በተቀመጠው ይምላል።

²³እናንተ የሕግ መምህራንና ፈሪሳውያን፣ እናንተ ግብዞች፣ ወዮላችሁ! ከናናና ከእንስላል ከከሙንም እንኳ አንድ አሥረኛውን ለእግዚአብሔር ትለያላችሁ፤ ነገር ግን በሕጉ ውስጥ ከሁሉ የሚከብዱትን፣ ፍትሕን፣ ምሕረትንና ታማኝነትን ትታችኋል። እነዚያን ሳትተዉ ማድረግ የሚገባችሁ እነዚህን ነበር።^{c 24}እናንተ ዕውሮች መሪዎች! ከመጠጣችሁ ትንኝን አጣርታችሁ ታወጣላችሁ፤ ግመልን ግን ሙሉውን ትውጣላችሁ።

²⁵እናንተ የሕግ መምህራንና ፈሪሳውያን፣ እናንተ ግብዞች፣ ወዮላችሁ! የጽዋንና የሳሕንን ውጭ ታጥባላችሁ፤ ውስጣቸው ግን በዝርፊያና በስስት የተሞላ ነው። ²⁶አንተ ዕውር ፈሪሳዊ! ውጩም ንጹሕ እንዲሆን አስቀድመህ የጽዋውንና የሳሕኑን ውስጥ አንጻ።

²⁷እናንተ የሕግ መምህራንና ፈሪሳውያን፣ እናንተ ግብዞች፣ ወዮላችሁ! በኖራ የተለሰኑ መቃብሮችን ትመስላላችሁ። ከውጭ ሲታዩ ያምራሉ፤ በውስጣቸው ግን የሙታን አጥንትና ልዩ ልዩ ርኩሰት ሞልቶባቸዋል። ²⁸እናንተም እንደዚሁ ናችሁ። በውጭ ለሰዎች ጻድቃን ትመስላላችሁ፤ በውስጣችሁ ግን ግብዝነትና የእግዚአብሔርን ሕግ መናቅ ሞልቶባችኋል።

²⁹እናንተ የሕግ መምህራንና ፈሪሳውያን፣ እናንተ ግብዞች፣ ወዮላችሁ! ለነቢያት መቃብሮችን ትሠራላችሁ፤ የጻድቃንንም መታሰቢያዎች ታስጌጣላችሁ። ³⁰ከዚያም፦ “በአባቶቻችን ዘመን በሕይወት ኖረን ቢሆን ኖሮ፣ ነቢያትን በመግደል ከእነርሱ ጋር ፈጽሞ ባልተባበርን ነበር” ትላላችሁ። ³¹የገዛ ቃላችሁ በእናንተ ላይ ይመሰክራል፤ እናንተ የነቢያት ገዳዮች ልጆች ናችሁ። ³²እንግዲያውስ የአባቶቻችሁን የኃጢአት መስፈሪያ ሙሉ! ³³እናንተ እባቦች! እናንተ የእፉኝት ዘሮች! ከገሃነም ፍርድ እንዴት ልታመልጡ ትችላላችሁ? ³⁴ስለዚህ ነቢያትን፣ ጠቢባንንና የሕግ መምህራንን ወደ እናንተ እልካለሁ። ከእነርሱ አንዳንዶቹን ትገድላላችሁ፤ ትሰቅላላችሁም። ሌሎቹን በምኩራቦቻችሁ ትገርፋላችሁ፤ ከከተማ ወደ ከተማም እያሳደዳችሁ ታባርሯቸዋላችሁ። ³⁵በዚህም በምድር ላይ ለፈሰሰው ንጹሕ ደም ሁሉ በደሉ በእናንተ ላይ ይወድቃል፤ ከጻድቁ ሰው ከአቤል ደም አንሥቶ በቤተ መቅደሱና በመሠዊያው መካከል የገደላችሁት የበራክዩ ልጅ የዘካርያስ ደም እስኪደርስ ድረስ።^{d 36}እውነት እላችኋለሁ፣ ይህ ሁሉ በዚህ ትውልድ ላይ ይወርዳል። ³⁷ኢየሩሳሌም፣ ኢየሩሳሌም! ነቢያትን ትገድያለሽ፤ ወደ አንቺ የተላኩትንም መልእክተኞች በድንጋይ ትወግሪያለሽ። ዶሮ ጫጩቶቿን ከክንፎቿ ሥር እንደምትሰበስብ፣ ልጆችሽን ልሰበስብ ስንት ጊዜ ፈለግሁ! እናንተ ግን እምቢ አላችሁ። ³⁸አሁን ቤታችሁ ባድማ ሆኖ ይተውላችኋል።^{e 39}እላችኋለሁና፤ “በጌታ ስም የሚመጣ የተባረከ ነው” እስክትሉ ድረስ ከእንግዲህ ወዲህ ዳግመኛ አታዩኝም።»^f