ማቴዎስ 7

¹እናንተ እንዳይፈረድባችሁ በሌሎች ላይ መፍረዳችሁን ተዉ። ²በሌሎች ላይ በፈረዳችሁበት መንገድ ይፈረድባችኋል፤ ለእነርሱ በተጠቀማችሁበትም መለኪያ ይለካላችኋል። ³በራስህ ዓይን ያለውን ትልቅ ግንድ ሳታስተውል በወንድምህ ወይም በእኅትህ ዓይን ያለውን ጉድፍ ለምን ትኩር ብለህ ታያለህ? ⁴በራስህ ዓይን ውስጥ ሁልጊዜ ግንድ እያለ፣ ወንድምህን ወይም እኅትህን “ያንን ጉድፍ ከዓይንህ ላውጣልህ” እንዴት ትላለህ? ⁵አንተ ግብዝ! አስቀድመህ ከራስህ ዓይን ግንዱን አውጣ። ከዚያ በኋላ ከወንድምህ ወይም ከእኅትህ ዓይን ጉድፉን ለማውጣት አጥርተህ ማየት ትችላለህ።

⁶ቅዱስ ነገርን ለውሾች አትስጡ፤ ዕንቁዎቻችሁንም ለአሳማዎች አትጣሉ። አለዚያ በእግራቸው ይረግጧቸዋል፤ ከዚያም ተመልሰው ይቦጫጭቋችኋል።^a

⁷መለመናችሁን ቀጥሉ፤ ትቀበላላችሁ። መፈለጋችሁን ቀጥሉ፤ ታገኛላችሁ። ማንኳኳታችሁን ቀጥሉ፤ በሩ ይከፈትላችኋል። ⁸የሚለምን ሁሉ ይቀበላል፤ የሚፈልግ ሁሉ ያገኛል፤ ለሚያንኳኳም ሁሉ በሩ ይከፈትለታል። ⁹ከእናንተ መካከል ልጁ ዳቦ ሲለምነው ድንጋይ የሚሰጥ ማን አለ? ¹⁰ወይስ ዓሣ ሲለምነው እባብ ይሰጠዋልን? ¹¹እንግዲህ እናንተ ኃጢአተኞች ሆናችሁ እንኳ ለልጆቻችሁ መልካም ስጦታ መስጠት የምታውቁ ከሆነ፣ በሰማይ ያለው አባታችሁ ለሚለምኑት መልካም ነገሮችን ከዚህ እጅግ በበለጠ ይሰጣቸዋል!

¹²ስለዚህ በሁሉም ነገር ሌሎች እንዲያደርጉላችሁ የምትፈልጉትን እናንተም አድርጉላቸው፤ ሕግና ነቢያት የሚያስተምሩት ይህንኑ ነው።

¹³በጠባቡ በር ግቡ። ወደ ጥፋት የሚወስደው በር ሰፊ፣ መንገዱም ቀላል ነው፤ በዚያም የሚገቡ ብዙ ናቸው። ¹⁴ወደ ሕይወት የሚወስደው በር ግን ጠባብ፣ መንገዱም አስቸጋሪ ነው፤ የሚያገኙትም ጥቂቶች ብቻ ናቸው።

¹⁵ከሐሰተኛ ነቢያት ተጠበቁ። በግ መስለው ይመጡባችኋል፤ ውስጣቸው ግን የተራቡ ተኩላዎች ናቸው። ¹⁶ሕይወታቸው በሚያፈራው ነገር ታውቋቸዋላችሁ። ሰዎች ከእሾህ ቁጥቋጦ ወይን፣ ወይም ከኩርንችት በለስ ይለቅማሉን? ¹⁷በዚሁ ዓይነት ጤናማ ዛፍ ሁሉ መልካም ፍሬ ያፈራል፤ የታመመ ዛፍ ግን መጥፎ ፍሬ ያፈራል። ¹⁸ጤናማ ዛፍ መጥፎ ፍሬ ማፍራት አይችልም፤ የታመመ ዛፍም መልካም ፍሬ ማፍራት አይችልም። ¹⁹መልካም ፍሬ የማያፈራ ዛፍ ሁሉ ተቆርጦ ወደ እሳት ይጣላል። ²⁰ስለዚህ ሕይወታቸው በሚያፈራው ነገር ታውቋቸዋላችሁ።

²¹“ጌታ ሆይ፣ ጌታ ሆይ” ብሎ የሚጠራኝ ሁሉ ወደ መንግሥተ ሰማያት አይገባም፤ የሚገቡት በሰማይ ያለው አባቴ የሚፈልገውን የሚያደርጉ ብቻ ናቸው። ²²በዚያ ቀን ብዙዎች እንዲህ ይሉኛል፦ “ጌታ ሆይ፣ ጌታ ሆይ፣ በስምህ ትንቢት የተናገርን፣ በስምህ አጋንንትን ያወጣን፣ በስምህም ብዙ ተአምራትን ያደረግን አይደለንምን?” ²³ያን ጊዜም በግልጽ እንዲህ እላቸዋለሁ፦ “ፈጽሞ አላወቅኋችሁም። እናንተ የእግዚአብሔርን ሕግ የምትጥሱ፣ ከእኔ ሂዱ።”

²⁴ስለዚህ እዚህ የተናገርኩትን ሰምቶ በሥራ ላይ የሚያውለው ሁሉ፣ ቤቱን በጠንካራ ዓለት ላይ የሠራን አስተዋይ ሰው ይመስላል። ²⁵ዝናቡ ዘነበ፤ ጎርፉ ተነሣ፤ ነፋሱም ነፍሶ ያን ቤት መታው። ነገር ግን መሠረቱ በዓለት ላይ ስለ ነበረ አልወደቀም። ²⁶እዚህ የተናገርኩትንም ሰምቶ በሥራ ላይ የማያውለው ሁሉ፣ ቤቱን በአሸዋ ላይ የሠራን ሞኝ ሰው ይመስላል። ²⁷ዝናቡ ዘነበ፤ ጎርፉ ተነሣ፤ ነፋሱም ነፍሶ ያን ቤት ደበደበው፤ ቤቱም ወደቀ። እንዴት ያለ ታላቅ አወዳደቅ ነበር!»

²⁸ኢየሱስ እነዚህን ቃሎች በጨረሰ ጊዜ ሕዝቡ በትምህርቱ ተደነቁ። ²⁹እንደ ሕግ መምህሮቻቸው ሳይሆን፣ የራሱ ሥልጣን እንዳለው ሰው ያስተምራቸው ነበር።