ማቴዎስ 27

¹ማለዳ ላይ የካህናት አለቆች ሁሉና የሕዝቡ ሽማግሌዎች ተሰብስበው ኢየሱስ እንዲገደል ወሰኑበት። ²አሥረውም ወሰዱት፤ ለአገረ ገዡ ለጲላጦስ አሳልፈው ሰጡት።

³ኢየሱስን የከዳው ይሁዳ ኢየሱስ እንደ ተፈረደበት ባየ ጊዜ እጅግ ተጸጸተ፤ ሠላሳውንም የብር ሳንቲም ለካህናት አለቆችና ለሽማግሌዎች መለሰ። ⁴«ኃጢአት ሠርቻለሁ» አለ፤ «ንጹሕ ሰው ለሞት አሳልፌ ሰጥቻለሁ።» እነርሱም እንዲህ ብለው መለሱ፦ «ይህ እኛን ምን ይመለከተናል? ጉዳዩ የአንተ ነው።» ⁵ይሁዳም የብሩን ሳንቲሞች ወደ ቤተ መቅደሱ ወርውሮ ወጣ። ከዚያም ሄዶ ራሱን ሰቀለ። ⁶የካህናት አለቆቹ ሳንቲሞቹን ሰበሰቡ። «ሕጉ ይህን ወደ ቤተ መቅደሱ ግምጃ ቤት እንድንጨምረው አይፈቅድልንም» አሉ፤ «ለሰው ሞት የተከፈለ ገንዘብ ነውና።» ⁷ከተወያዩ በኋላ በገንዘቡ የሸክላ ሠሪውን እርሻ ለመግዛት ወሰኑ፤ ከሌላ አገር የመጡ ሰዎች የሚቀበሩበት ቦታ እንዲሆን ነው። ⁸ያ እርሻ ከዚያ ጊዜ ጀምሮ እስከ ዛሬ ድረስ የደም እርሻ እየተባለ የሚጠራው በዚህ ምክንያት ነው። ⁹በዚያን ጊዜ በነቢዩ በኤርምያስ የተነገረው ቃል ተፈጸመ፦ «ከእስራኤል ሕዝብ አንዳንዶቹ ዋጋ የተመኑለትን የእርሱን ዋጋ፣ ሠላሳውን የብር ሳንቲም ወሰዱ፤ ¹⁰ጌታም እንዳዘዘኝ ለሸክላ ሠሪው እርሻ መግዣ ሰጡአቸው።»^a

¹¹ኢየሱስም አሁን በአገረ ገዡ ፊት ቆሞ ነበር፤ አገረ ገዡም፦ «አንተ የአይሁድ ንጉሥ ነህ?» ብሎ ጠየቀው። ኢየሱስም፦ «ይህን የምትለው አንተ ነህ» ብሎ መለሰ። ¹²የካህናት አለቆችና ሽማግሌዎች ክሳቸውን ባቀረቡበት ጊዜ ግን ምንም መልስ አልሰጠም። ¹³ከዚያም ጲላጦስ፦ «የሚያቀርቡብህን ክስ ሁሉ አትሰማም?» አለው። ¹⁴ኢየሱስ ግን ለአንዱም ክስ እንኳ መልስ አልሰጠውም፤ አገረ ገዡም በዚህ እጅግ ተደነቀ።

¹⁵በየበዓሉ አገረ ገዡ ሕዝቡ የመረጡትን አንድ እስረኛ ይፈታላቸው ነበር። ¹⁶በዚያን ጊዜ ሁሉም የሚያውቀው ኢየሱስ በርባን የሚባል እስረኛ ይዘው ነበር።^{b 17}ሕዝቡ በተሰበሰቡ ጊዜ ጲላጦስ፦ «ማንን እንድፈታላችሁ ትፈልጋላችሁ? ኢየሱስ በርባንን ወይስ ክርስቶስ የሚባለውን ኢየሱስን?» ብሎ ጠየቃቸው። ¹⁸ኢየሱስን አሳልፈው የሰጡት በቅናት ተነሣሥተው እንደ ሆነ ያውቅ ነበር።

¹⁹ጲላጦስ በፍርድ ወንበሩ ላይ ተቀምጦ ሳለ ሚስቱ እንዲህ የሚል መልእክት ላከችለት፦ «ያንን ጻድቅ ሰው ተወው፤ ዛሬ በሕልሜ በእርሱ ምክንያት እጅግ ተጨንቄአለሁ።»

²⁰የካህናት አለቆችና ሽማግሌዎች ግን በርባን እንዲፈታ፣ ኢየሱስ ግን እንዲገደል እንዲጠይቁ ሕዝቡን አሳመኑ። ²¹አገረ ገዡም እንደገና፦ «ከእነዚህ ከሁለቱ ማንን እንድፈታላችሁ ትፈልጋላችሁ?» ብሎ ጠየቃቸው። «በርባንን!» አሉ። ²²ጲላጦስም፦ «ታዲያ ክርስቶስ የሚባለውን ኢየሱስን ምን ላድርገው?» ብሎ ጠየቃቸው። ሁሉም፦ «ይሰቀል!» ብለው ጮኹ። ²³ጲላጦስም፦ «ግን ምን በደል አደረገ?» ብሎ ጠየቀ። እነርሱ ግን ድምፃቸውን ይበልጥ ከፍ አድርገው፦ «ይሰቀል!» እያሉ ጮኹ። ²⁴ጲላጦስ ምንም ሊያደርግ እንዳልቻለና ይልቁንም ሁከት እየተነሣ እንደ ሆነ አየ። ስለዚህ ውኃ ወስዶ በሕዝቡ ፊት እጆቹን ታጠበ። «በዚህ ሰው ሞት በደል የለብኝም» አለ፤ «ጉዳዩ የእናንተ ነው።» ²⁵በዚያ የነበሩት ሕዝብ ሁሉ፦ «የሞቱ በደል በእኛና በልጆቻችን ላይ ይሁን!» ብለው መለሱ።^{c 26}ስለዚህ ጲላጦስ እንደ ፈለጉት በርባንን ፈታላቸው። ኢየሱስን ግን እንዲገረፍ አዘዘ፤ ከዚያም እንዲሰቀል አሳልፎ ሰጠው።

²⁷የአገረ ገዡ ወታደሮችም ኢየሱስን ወደ አገረ ገዡ መኖሪያ ግቢ አስገቡት፤ ጭፍራውም ሁሉ በዙሪያው ተሰበሰበ። ²⁸ልብሱን አውልቀው ቀይ የወታደር ካባ አለበሱት። ²⁹ከእሾህ ቅርንጫፍ አክሊል ጎንጉነው በራሱ ላይ ደፉለት፤ በቀኝ እጁም በትር አስያዙት። ከዚያም በፊቱ ተንበርክከው፦ «የአይሁድ ንጉሥ ሆይ፣ ሰላም ለአንተ ይሁን!» እያሉ አፌዙበት። ³⁰ተፉበትም፤ በትሩንም ወስደው ደጋግመው ራሱን መቱት። ³¹ማፌዛቸውን ከጨረሱ በኋላ ካባውን ገፈፉት፤ የራሱንም ልብስ መልሰው አለበሱት። ከዚያም ሊሰቅሉት ይዘውት ወጡ።

³²ሲወጡ ስምዖን የሚባል የቀሬና ሰው አገኙ፤ የኢየሱስንም መስቀል እንዲሸከም አስገደዱት።

³³ጎልጎታ ወደሚባል ስፍራ ደረሱ፤ ትርጓሜውም የራስ ቅል ስፍራ ማለት ነው። ³⁴ሐሞት የተቀላቀለበት የወይን ጠጅ እንዲጠጣ ሰጡት። እርሱም ቀምሶ ሊጠጣው አልፈለገም። ³⁵ከሰቀሉትም በኋላ ዕጣ ተጣጥለው ልብሶቹን ተከፋፈሉ። ³⁶ከዚያም በዚያ ተቀምጠው ይጠብቁት ጀመር።^{d 37}ከራሱ በላይ የተከሰሰበትን ጽፈው አኖሩ፦ «ይህ የአይሁድ ንጉሥ ኢየሱስ ነው።»

³⁸ሁለት ወንበዴዎችም አንዱ በቀኙ ሌላው በግራው ከእርሱ ጋር ተሰቀሉ። ³⁹በዚያ የሚያልፉ ሰዎች ራሳቸውን እየነቀነቁ ሰደቡት። ⁴⁰«ቤተ መቅደሱን አፍርሰህ በሦስት ቀን መልሰህ ልትሠራው ነበር!» አሉ። «ራስህን አድን! የእግዚአብሔር ልጅ ከሆንህ ከመስቀሉ ውረድ!» ⁴¹እንደዚሁም የካህናት አለቆች ከሕግ መምህራንና ከሽማግሌዎች ጋር ሆነው አፌዙበት፤ እንዲህም አሉ፦ ⁴²«ሌሎችን አዳነ፤ ራሱን ግን ማዳን አቃተው። የእስራኤል ንጉሥ ነው አይደል? እንግዲያውስ አሁኑኑ ከመስቀሉ ይውረድ፤ እኛም በእርሱ እናምናለን። ⁴³በእግዚአብሔር ተማምኗል፤ እንግዲህ እግዚአብሔር በእውነት ቢፈልገው አሁን ይታደገው። “የእግዚአብሔር ልጅ ነኝ” ብሏልና።» ⁴⁴ከእርሱ ጋር የተሰቀሉት ወንበዴዎች እንኳ ያንኑ ስድብ ሰደቡት።

⁴⁵ከቀኑ ስድስት ሰዓት ጀምሮ እስከ ዘጠኝ ሰዓት ድረስ በምድር ሁሉ ላይ ጨለማ ሆነ። ⁴⁶በቀኑ ዘጠኝ ሰዓት ገደማ ኢየሱስ በታላቅ ድምፅ ጮኸ፦ «ኤሊ፣ ኤሊ፣ ለማ ሰበቅታኒ?» ትርጉሙም፦ «አምላኬ፣ አምላኬ፣ ለምን ትተኸኛል?» ማለት ነው። ⁴⁷በአጠገቡ ከቆሙት አንዳንዶቹ ይህን ሰምተው፦ «ይህ ሰውዬ ኤልያስን እየጠራ ነው!» አሉ። ⁴⁸ወዲያውም ከእነርሱ አንዱ ሮጦ ሰፍነግ አመጣ። በኮምጣጣ የወይን ጠጅ ነክሮ በበትር ጫፍ ላይ አደረገውና እንዲጠጣ ወደ እርሱ አቀረበለት። ⁴⁹ሌሎቹ ግን፦ «ቆይ፤ ኤልያስ ሊያድነው ይመጣ እንደ ሆነ እንይ» አሉት።^{e 50}ኢየሱስም እንደገና በታላቅ ድምፅ ጮኾ መንፈሱን አሳልፎ ሰጠ። ⁵¹በዚያን ጊዜ የቤተ መቅደሱ መጋረጃ ከላይ እስከ ታች ድረስ ለሁለት ተቀደደ። ምድር ተናወጠች፤ ዓለቶችም ተሰነጣጠቁ። ⁵²መቃብሮች ተከፈቱ፤ በሞት አንቀላፍተው የነበሩ የብዙ የእግዚአብሔር ቅዱሳን ሰዎች አካላትም ተነሡ። ⁵³ኢየሱስ ከሞት ከተነሣ በኋላ ከመቃብሮቹ ወጥተው ወደ ቅድስቲቱ ከተማ ገቡ፤ ለብዙ ሰዎችም ተገለጡ።

⁵⁴የመቶ አለቃውና ከእርሱ ጋር ኢየሱስን ይጠብቁ የነበሩት ሰዎች የምድሩን መናወጥና የሆነውን ሁሉ አዩ፤ በፍርሀትም ተሞሉ። «ይህ ሰው በእውነት የእግዚአብሔር ልጅ ነበር!» አሉ።^f

⁵⁵ብዙ ሴቶችም ከሩቅ ቆመው ይመለከቱ ነበር። እነዚህ ሴቶች የሚያስፈልገውን እያሟሉለት ከገሊላ ጀምሮ ኢየሱስን የተከተሉ ነበሩ። ⁵⁶በመካከላቸውም መግደላዊት ማርያም፣ የያዕቆብና የዮሴፍ እናት ማርያም፣ የዘብዴዎስ ልጆች እናትም ነበሩ።

⁵⁷ምሽት ሲቃረብም ከአርማትያስ ከተማ የሆነ ዮሴፍ የሚባል አንድ ሀብታም ሰው መጣ፤ እርሱም ደግሞ ከኢየሱስ ደቀ መዛሙርት አንዱ ሆኖ ነበር። ⁵⁸እርሱም ወደ ጲላጦስ ሄዶ የኢየሱስን ሥጋ ጠየቀ። ጲላጦስም ለእርሱ እንዲሰጠው አዘዘ። ⁵⁹ዮሴፍም ሥጋውን ወስዶ በንጹሕ የበፍታ ጨርቅ ገነዘው። ⁶⁰ለራሱ በዓለት ውስጥ ባስፈለፈለው አዲስ መቃብር አኖረው፤ ታላቅ ድንጋይም ወደ መቃብሩ መግቢያ አንከባሎ ሄደ። ⁶¹መግደላዊት ማርያምና ሌላዋ ማርያምም በዚያ ነበሩ፤ ፊታቸውን ወደ መቃብሩ አድርገው ተቀምጠው ነበር።

⁶²በሚቀጥለው ቀን፣ ማለትም ከዝግጅት ቀን በኋላ ባለው ቀን፣ የካህናት አለቆችና ፈሪሳውያን በአንድነት ወደ ጲላጦስ መጡ። ⁶³«ጌታችን ሆይ» አሉ፤ «ያ አሳች ገና በሕይወት ሳለ የተናገረውን አንድ ነገር አስታወስን፤ “ከሦስት ቀን በኋላ እነሣለሁ” ብሎ ነበር። ⁶⁴ስለዚህ መቃብሩ እስከ ሦስተኛው ቀን ድረስ በጥንቃቄ እንዲጠበቅ ትእዛዝ ይስጡ። አለበለዚያ ደቀ መዛሙርቱ መጥተው በስውር ሊወስዱትና ለሕዝቡ፦ “ከሙታን ተነሥቷል” ብለው ሊያውጁ ይችላሉ። ይህ የመጨረሻው ማጭበርበርም ከመጀመሪያው የበለጠ ጉዳት ያመጣል።» ⁶⁵ጲላጦስም፦ «ጠባቂ ወታደሮች መውሰድ ትችላላችሁ። ሂዱና በተሻለ በምታስቡት መንገድ አስጠብቁት» አላቸው። ⁶⁶እነርሱም ሄደው ድንጋዩን አተሙ፤ ጠባቂዎቹንም አቁመው መቃብሩን አስጠበቁ።