ማቴዎስ 11

¹ኢየሱስ ለአሥራ ሁለቱ ደቀ መዛሙርቱ ይህን መመሪያ ሰጥቶ ከጨረሰ በኋላ፣ በከተሞቻቸው ለማስተማርና መልእክቱን ለማወጅ ከዚያ ተነሥቶ ሄደ።

²በዚህ መካከል በእስር ቤት የነበረው ዮሐንስ የክርስቶስ ሥራዎችን ሰማ። በደቀ መዛሙርቱም በኩል መልእክት ልኮ ³እንዲህ ሲል ጠየቀው፦ «የሚመጣው አንተ ነህ ወይስ ሌላ ሰው እንጠብቅ?» ⁴ኢየሱስም እንዲህ ሲል መለሰላቸው፦ «ተመልሳችሁ የምትሰሙትንና የምታዩትን ለዮሐንስ ንገሩት፤ ⁵ዓይነ ስውሮች ያያሉ፤ አንካሶች ይራመዳሉ፤ ለምጽ ያለባቸው ይነጻሉ፤ መስማት የተሳናቸው ይሰማሉ፤ ሙታን ወደ ሕይወት ይነሣሉ፤ ድሆችም ወንጌልን ይሰማሉ። ⁶በእኔ ምክንያት የማይሰናከል ሰው የተባረከ ነው።»

⁷እነርሱ በመንገድ ላይ ሳሉ ኢየሱስ ስለ ዮሐንስ ለሕዝቡ መናገር ጀመረ። «ወደ ምድረ በዳ በወጣችሁ ጊዜ ምን ለማየት ሄዳችሁ ነበር? በነፋስ ወዲያና ወዲህ የሚል ሸምበቆን? ⁸ይህ ካልሆነ ምን ለማየት ወጣችሁ? ለስላሳና ውድ ልብስ የለበሰ ሰውን? የቅንጦት ልብስ የሚለብሱ ሰዎች የሚገኙት በነገሥታት ቤተ መንግሥት ነው። ⁹ታዲያ ለምን ወጣችሁ? ነቢይ ለማየት? አዎን፣ እላችኋለሁ፤ እርሱ ከነቢይ እንኳ ይበልጣል። ¹⁰መጽሐፍ እንዲህ የሚለው ስለዚህ ሰው ነው፦ “መልእክተኛዬን ከአንተ አስቀድሜ እልካለሁ፤ እርሱም በፊትህ መንገድህን ያዘጋጃል።” ¹¹እውነት እላችኋለሁ፤ ከሴት ከተወለዱት ሁሉ መካከል ከመጥምቁ ዮሐንስ የሚበልጥ ማንም አልተገለጠም። ሆኖም በመንግሥተ ሰማያት ከሁሉ ያነሰው እንኳ ከእርሱ ይበልጣል። ¹²ከመጥምቁ ዮሐንስ ጊዜ አንሥቶ እስከ ዛሬ ድረስ መንግሥተ ሰማያት ጥቃት እየደረሰባት ነው፤ ዓመፀኞችም ሊነጥቋት ይሞክራሉ።^{a 13}ሁሉም ነቢያትና ሕጉ ዮሐንስ እስኪመጣ ድረስ ስለሚመጣው ነገር ተናግረዋልና። ¹⁴ልትቀበሉት ብትፈልጉ፣ ዮሐንስ መምጣቱ አስቀድሞ የተነገረለት ኤልያስ ነው። ¹⁵ጆሮ ያለው ሁሉ ያዳምጥ።

¹⁶የዚህን ትውልድ ሰዎች በምን ልመስላቸው? በከተማው አደባባይ ተቀምጠው ሌሎቹን ልጆች የሚጣሩ ልጆችን ይመስላሉ፤ ¹⁷“ዋሽንት ነፋንላችሁ፤ እናንተ ግን አልጨፈራችሁም፤ የለቅሶ ዜማ አዜምን፤ እናንተ ግን ደረታችሁን እየመታችሁ አላለቀሳችሁም።” ¹⁸ዮሐንስ በመጣ ጊዜ እንደ ሌሎች ሰዎች አልበላም አልጠጣምም፤ ሰዎችም “ጋኔን አድሮበታል” ይላሉ። ¹⁹የሰው ልጅ መጥቶ በላ፤ ጠጣም፤ እነርሱም “እዩት! ከመጠን በላይ ይበላል፤ ከመጠን በላይ ይጠጣል፤ የቀራጮችና የኃጢአተኞችም ጓደኛ ነው!” ይላሉ። ሆኖም የጥበብ ሥራዎች ጥበብ ትክክል መሆኗን ያሳያሉ።»^b

²⁰በዚያን ጊዜ ኢየሱስ አብዛኞቹን የኃይል ሥራዎቹን ያዩትን ከተሞች ንስሓ ስላልገቡ ይወቅሳቸው ጀመር። ²¹«ወዮልሽ ኮራዚን! ወዮልሽ ቤተ ሳይዳ! በእናንተ መካከል የተደረጉትን የኃይል ሥራዎች ጢሮስና ሲዶና አይተው ቢሆን ኖሮ፣ ማቅ ለብሰውና በአመድ ላይ ተቀምጠው ከብዙ ጊዜ በፊት ንስሓ በገቡ ነበር። ²²ነገር ግን እላችኋለሁ፤ በፍርድ ቀን ከእናንተ ይልቅ ለጢሮስና ለሲዶና ይቀልላቸዋል። ²³አንቺም ቅፍርናሆም፣ እስከ ሰማይ ድረስ ትከበሪያለሽን? አይደለም፣ እስከ ሲኦል ትወርጃለሽ። በአንቺ የተደረጉትን የኃይል ሥራዎች ሰዶም አይታ ቢሆን ኖሮ፣ እስከ ዛሬ በቆመች ነበር።^{c 24}ነገር ግን እላችኋለሁ፤ በፍርድ ቀን ከአንቺ ይልቅ ለሰዶም ምድር ይቀልላታል።»

²⁵በዚያን ጊዜ ኢየሱስ እንዲህ አለ፦ «አባት ሆይ፣ የሰማይና የምድር ጌታ፣ እነዚህን ነገሮች ከጥበበኞችና ከአዋቂዎች ሰውረህ ለሕፃናት ስለ ገለጥህላቸው አመሰግንሃለሁ። ²⁶አዎን፣ አባት ሆይ፣ እንዲህ መሆኑ ደስ አሰኝቶሃል።

²⁷አባቴ ሁሉን ነገር ሰጥቶኛል። ከአብ በቀር ወልድን በሚገባ የሚያውቅ የለም፤ ከወልድና ወልድ አብን ሊገልጥላቸው ከሚፈቅድላቸው በቀር አብን በሚገባ የሚያውቅ የለም።

²⁸እናንተ በሥራ የዛላችሁና በሸክም የተጫናችሁ ሁሉ፣ ወደ እኔ ኑ፤ እኔም ዕረፍት እሰጣችኋለሁ። ²⁹ቀንበሬን በጫንቃችሁ ላይ አድርጉ፤ ከእኔም ተማሩ፤ ገር ነኝና፤ ልቤም ትሑት ነው። ከዚያም ለነፍሶቻችሁ ዕረፍት ታገኛላችሁ። ³⁰ቀንበሬ ለመሸከም ምቹ ነው፤ የምሰጣችሁም ሸክም ቀላል ነው።»