ማቴዎስ 6

¹ሌሎች እንዲያዩአችሁ ብላችሁ ጽድቃችሁን በሰው ፊት ለታይታ እንዳታደርጉ ተጠንቀቁ። እንዲህ ብታደርጉ በሰማይ ያለው አባታችሁ የሚሰጣችሁ ዋጋ የለም።

²ስለዚህ ለድሆች ስትሰጥ፣ ግብዞች ከሰዎች ምስጋና ለማግኘት በምኩራቦችና በአደባባይ እንደሚያደርጉት በመለከት አታውጅ። እውነት እላችኋለሁ፤ ዋጋቸውን አስቀድመው ጨርሰው ተቀብለዋል። ³አንተ ግን ስትሰጥ ቀኝ እጅህ የሚያደርገውን ግራ እጅህ እስከማያውቅ ድረስ በጸጥታ ስጥ። ⁴ስጦታህ የተሰወረ ይሆናል፤ የተሰወረውንም የሚያይ አባትህ ይከፍልሃል።^a

⁵ስትጸልዩ እንደ ግብዞች አትሁኑ። እነርሱ ሌሎች እንዲያዩአቸው በምኩራቦችና በመንገድ ማዕዘኖች ቆመው መጸለይ ይወዳሉ። እውነት እላችኋለሁ፤ ዋጋቸውን አስቀድመው ጨርሰው ተቀብለዋል። ⁶አንተ ግን ስትጸልይ ወደ ውስጠኛ ክፍል ግባ፤ በሩን ዝጋና በዚያ በስውር ላለው አባትህ ጸልይ። አባትህ የተሰወረውን ያያል፤ እርሱም ይከፍልሃል።

⁷ስትጸልዩ አሕዛብ እንደሚያደርጉት ባዶ ቃላትን አትከምሩ። ብዙ ስለተናገሩ የሚሰሙ ይመስላቸዋል። ⁸ስለዚህ እነርሱን አትምሰሉ። አባታችሁ ገና ሳትጠይቁት የሚያስፈልጋችሁን አስቀድሞ ያውቃል።

⁹እንግዲህ እናንተ እንዲህ ብላችሁ ጸልዩ፦ “በሰማይ ያለህ አባታችን ሆይ፣ ስምህ የተቀደሰ ሆኖ ይከበር። ¹⁰መንግሥትህ ትምጣ። በሰማይ እንደሚደረገው ፈቃድህ በምድርም ይደረግ። ¹¹ለዛሬ የሚያስፈልገንን እንጀራ ስጠን።^{b 12}እኛ ደግሞ ዕዳ ያለባቸውን ይቅር እንዳልን፣ ላንተ ያለብንን ዕዳ ይቅር በለን። ¹³ወደ ፈተና አታምጣን፤ ከክፉው ግን አድነን።”^{cde 14}ሌሎች ሲበድሏችሁ ይቅር ብትሏቸው፣ በሰማይ ያለው አባታችሁ እናንተንም ይቅር ይላችኋል። ¹⁵ሌሎችን ይቅር ለማለት እምቢ ብትሉ ግን፣ አባታችሁም በደላችሁን ይቅር አይላችሁም።

¹⁶ስትጾሙ እንደ ግብዞች ፊታችሁን አታኮሳትሩ። እነርሱ መጾማቸውን ሌሎች እንዲያዩላቸው ፊታቸውን ያጨልማሉ። እውነት እላችኋለሁ፤ ዋጋቸውን አስቀድመው ጨርሰው ተቀብለዋል። ¹⁷አንተ ግን ስትጾም ራስህን ዘይት ተቀባ፤ ፊትህንም ታጠብ። ¹⁸እንዲህ ብታደርግ መጾምህን በስውር ካለው አባትህ በቀር ማንም አያውቅም። አባትህ የተሰወረውን ያያል፤ እርሱም ይከፍልሃል።

¹⁹ብልና ዝገት በሚያበላሹበት፣ ሌቦችም ግድግዳ ቆፍረው በሚሰርቁበት በምድር ላይ ለራሳችሁ ሀብት አታከማቹ። ²⁰ይልቁንም ብልና ዝገት በማያበላሹበት፣ ሌባም ቆፍሮ በማይሰርቅበት በሰማይ ለራሳችሁ ሀብት አከማቹ። ²¹ልብህ ሁልጊዜ ሀብትህ ባለበት ይሆናል።

²²ዓይን የሰውነት መብራት ነው። ስለዚህ ዓይንህ ጤናማ ከሆነ ሰውነትህ ሁሉ በብርሃን ይሞላል።^{f 23}ዓይንህ ግን ክፉ ከሆነ ሰውነትህ ሁሉ በጨለማ ይሞላል። ስለዚህ በውስጥህ ያለው ብርሃን በእርግጥ ጨለማ ከሆነ ያ ጨለማ ምንኛ ጥልቅ ነው!

²⁴ማንም ሁለት ጌቶችን ማገልገል አይችልም። ወይ አንዱን ጠልቶ ሌላውን ይወዳል፤ ወይም ለአንዱ ታማኝ ሆኖ ሌላውን ይንቃል። እግዚአብሔርንና ገንዘብን በአንድነት ማገልገል አትችሉም።

²⁵ስለዚህ እላችኋለሁ፤ ስለምትበሉት ብላችሁ ስለ ሕይወታችሁ፣ ስለምትለብሱትም ብላችሁ ስለ ሰውነታችሁ አትጨነቁ። ሕይወት ከምግብ፣ ሰውነትም ከልብስ አይበልጥምን? ²⁶በሰማይ የሚበርሩትን ወፎች ተመልከቱ። አይተክሉም፣ አያጭዱም፣ እህልም በጎተራ አያስቀምጡም፤ ሆኖም ሰማያዊ አባታችሁ ይመግባቸዋል። እናንተ ከእነርሱ እጅግ የበለጠ ዋጋ ያላችሁ አይደላችሁምን? ²⁷ከእናንተ በመጨነቅ በዕድሜው ላይ አንዲት ሰዓት እንኳ መጨመር የሚችል አለን?^{g 28}ስለ ልብስስ ለምን ትጨነቃላችሁ? የዱር አበቦች እንዴት እንደሚያድጉ አስቡ። አይለፉም፤ ፈትልም አይፈትሉም። ²⁹ነገር ግን እነግራችኋለሁ፤ ሰሎሞን በዚያ ሁሉ ክብሩ ሳለ እንኳ ከእነዚህ የአንዱን ያህል ያማረ ልብስ ለብሶ አያውቅም። ³⁰ዛሬ ያለውንና ነገ ወደ ምድጃ የሚጣለውን የዱር ሣር እግዚአብሔር እንዲህ የሚያለብሰው ከሆነ፣ እናንተ እምነታችሁ ትንሽ የሆነ፣ እናንተንማ ከዚህ እጅግ አብልጦ አያለብሳችሁምን? ³¹ስለዚህ እንዲህ ብላችሁ አትጨነቁ፦ “ምን እንበላለን?” ወይም “ምን እንጠጣለን?” ወይም “ምን እንለብሳለን?” ³²አሕዛብ ይህን ሁሉ ለማግኘት ይሯሯጣሉ፤ ሰማያዊ አባታችሁም ይህ ሁሉ እንደሚያስፈልጋችሁ ያውቃል። ³³ከሁሉ በፊት መንግሥቱንና ጽድቁን ፈልጉ፤ እነዚህንም ሁሉ በተጨማሪ ታገኛላችሁ። ³⁴ስለዚህ ስለ ነገ አትጨነቁ፤ ነገ የራሱን ጭንቀት ራሱ ይወጣዋል። የዛሬው ችግር ለዛሬ ይበቃል።