ማቴዎስ 13

¹በዚያው ቀን ኢየሱስ ከቤት ወጥቶ በሐይቁ ዳር ተቀመጠ። ²እጅግ ብዙ ሕዝብ በዙሪያው ስለ ተሰበሰበ ወደ ጀልባ ገብቶ በውስጧ ተቀመጠ፤ ሕዝቡም ሁሉ በዳርቻው ላይ ቆመ። ³ብዙ ነገርንም በምሳሌዎች ነገራቸው። «ስሙ!» አለ፤ «አንድ ዘሪ ዘር ሊዘራ ወጣ። ⁴ሲዘራም ከዘሩ አንዳንዱ በመንገድ ዳር ወደቀ፤ ወፎችም መጥተው ሁሉንም በሉት። ⁵አንዳንዱ ደግሞ አፈሩ ስስ በሆነ ጭንጫማ ስፍራ ወደቀ። አፈሩ ጥልቅ ስላልነበረ ወዲያው በቀለ፤ ⁶ፀሐይ በወጣች ጊዜ ግን ቡቃያው ተቃጠለ፤ ሥር ስላልነበረውም ደረቀ። ⁷ሌላው ዘር ደግሞ በእሾህ ቁጥቋጦ መካከል ወደቀ፤ እሾሁም ፈጥኖ አድጎ አፈነው። ⁸ሌላው ዘር ግን በመልካም አፈር ላይ ወደቀ፤ አድጎም ፍሬ ሰጠ፤ ከተዘራው መቶ እጥፍ፣ ወይም ስድሳ፣ ወይም ሠላሳ እጥፍ አፈራ። ⁹ጆሮ ያለው ሁሉ ያዳምጥ።»^a

¹⁰ደቀ መዛሙርቱ ወደ ኢየሱስ ቀርበው «ለእነርሱ ስትናገር ለምን ምሳሌዎችን ትጠቀማለህ?» ብለው ጠየቁት። ¹¹እርሱም እንዲህ ሲል መለሰላቸው፦ «ምክንያቱም የመንግሥተ ሰማያትን ምሥጢራት እንድታውቁ ተፈቅዶላችኋል፤ ለእነርሱ ግን አልተፈቀደላቸውም። ¹²ያላቸው ሰዎች ተጨማሪ ይሰጣቸዋል፤ የተትረፈረፈም ይኖራቸዋል። የሌላቸው ግን ያላቸውን እንኳ ያጣሉ። ¹³ስለዚህ በምሳሌዎች እናገራቸዋለሁ፤ ይመለከታሉ ነገር ግን አያዩም፤ ያዳምጣሉ ነገር ግን አይሰሙም፤ አያስተውሉምም። ¹⁴የኢሳይያስ ትንቢት በእነርሱ ላይ እየተፈጸመ ነው፦ “ደጋግማችሁ ትሰማላችሁ፤ ነገር ግን ፈጽሞ አታስተውሉም፤ ደጋግማችሁ ትመለከታላችሁ፤ ነገር ግን ፈጽሞ አትገነዘቡም። ¹⁵የዚህ ሕዝብ ልብ ደንዝዟል። ጆሯቸው በጭንቅ ይሰማል፤ ዓይኖቻቸውንም አጥብቀው ጨፍነዋል። እንዲህ ባያደርጉ ኖሮ፣ በዓይኖቻቸው ባዩ፣ በጆሯቸው በሰሙ፣ በልባቸውም ባስተዋሉና በተመለሱ ነበር፤ እኔም በፈወስኋቸው ነበር።” ¹⁶የእናንተ ዓይኖች ግን የተባረኩ ናቸው፤ ያያሉና። ጆሮዎቻችሁም እንዲሁ የተባረኩ ናቸው፤ ይሰማሉና። ¹⁷እውነት እላችኋለሁ፣ ብዙ ነቢያትና ጻድቃን አሁን የምታዩትን ለማየት ናፈቁ፤ ነገር ግን አላዩትም፤ አሁን የምትሰሙትንም ለመስማት ናፈቁ፤ ነገር ግን አልሰሙትም።

¹⁸እንግዲያስ እናንተ የዘሪውን ምሳሌ ትርጉም ስሙ። ¹⁹በመንገድ ዳር የተዘራው ዘር የመንግሥቱን ቃል ሰምተው የማያስተውሉ ሰዎች ናቸው። ክፉው መጥቶ በልባቸው የተዘራውን ይወስዳል። ²⁰በጭንጫማ መሬት ላይ የተዘራው ዘር ቃሉን ሰምቶ ወዲያው በደስታ የሚቀበል ሰው ነው። ²¹ነገር ግን ቃሉ በእርሱ ውስጥ ሥር የለውም፤ ለጥቂት ጊዜ ብቻ ይጸናል። ስለ ቃሉ ችግር ወይም ስደት በመጣበት ጊዜ ወዲያውኑ ተሰናክሎ ይወድቃል። ²²በእሾህ መካከል የተዘራው ዘር ቃሉን የሚሰማ ሰው ነው፤ ነገር ግን የአሁኑ ዘመን ጭንቀትና የሀብት የሐሰት ተስፋ ቃሉን ያፍኑታል፤ ስለዚህ ፍሬ አያፈራም። ²³በመልካም አፈር ላይ የተዘራው ዘር ግን ቃሉን ሰምቶ የሚያስተውል ሰው ነው። ያ ሰው በእርግጥ ፍሬ ያፈራል፤ ከተዘራው መቶ እጥፍ፣ ወይም ስድሳ፣ ወይም ሠላሳ እጥፍ ይሰጣል።»

²⁴ከዚያም ኢየሱስ ሌላ ምሳሌ አቀረበላቸው፦ «መንግሥተ ሰማያት በእርሻው መልካም ዘር የዘራን ሰው ታሪክ ትመስላለች። ²⁵ነገር ግን ሰዎች ተኝተው ሳሉ አንድ ጠላቱ መጥቶ በስንዴው ሁሉ መካከል እንክርዳድ በትኖ ሄደ። ²⁶ስንዴው በቅሎ ዛላ ማውጣት በጀመረ ጊዜ እንክርዳዱም ብቅ አለ። ²⁷የመሬቱ ባለቤት ባሪያዎች ወደ እርሱ መጥተው እንዲህ አሉት፦ “ጌታችን፣ በእርሻዎ የዘሩት መልካም ዘር አልነበረምን? ታዲያ ይህ እንክርዳድ ከየት መጣ?” ²⁸“ይህን ያደረገ ጠላት ነው” አላቸው። ባሪያዎቹም “እንግዲያስ ወጥተን እንሰብስባቸውን?” ብለው ጠየቁት። ²⁹እርሱም “አይሆንም” ብሎ መለሰ፤ “እንክርዳዱን ስትሰበስቡ ስንዴውን አብራችሁ ልትነቅሉ ትችላላችሁና። ³⁰እስከ መከር ድረስ ጎን ለጎን እንዲያድጉ ተዉአቸው። የመከር ጊዜ ሲደርስ ለአጫጆቹ እንዲህ ብዬ አዝዛቸዋለሁ፦ ‘መጀመሪያ እንክርዳዱን ነቅላችሁ እንዲቃጠል በነዶ እሰሩት። ስንዴውን ግን በጎተራዬ አስገቡት።’”»

³¹ሌላም የሚያስቡበትን ምሳሌ ሰጣቸው፦ «አንድ ሰው ወስዶ በእርሻው የዘራትን የሰናፍጭ ዘር አስቡ። መንግሥተ ሰማያት እንደዚያ ናት። ³²ከዘሮች ሁሉ እጅግ ትንሿ ናት፤ ካደገች በኋላ ግን ከሌሎቹ የጓሮ ተክሎች ትረዝማለች፤ ዛፍም ትሆናለች፤ የዱር ወፎች መጥተው በቅርንጫፎቿ መካከል ጎጆ እስኪሠሩ ድረስ ትገዝፋለች።»^b

³³ሌላም ምሳሌ ነገራቸው፦ «መንግሥተ ሰማያት እርሾን ትመስላለች። አንዲት ሴት እርሾውን ወስዳ ከ18 ኪሎ ያህል ዱቄት ጋር ለወሰችው፤ ሊጡም ሁሉ ቦካ።»

³⁴ኢየሱስ ለሕዝቡ የተናገረውን ሁሉ በምሳሌዎች ተናገረ፤ እንዲያውም ያለ ምሳሌ ምንም አልነገራቸውም። ³⁵ይህም የሆነው በነቢዩ የተነገረው ቃል እንዲፈጸም ነው፦ «አፌን በምሳሌዎች እከፍታለሁ፤ ዓለም ከተመሠረተ ጀምሮ ተሰውሮ የነበረውን አፈስሳለሁ።»^cd

³⁶ከዚያም ኢየሱስ ሕዝቡን አሰናብቶ ወደ ቤት ገባ። ደቀ መዛሙርቱም ወደ እርሱ መጥተው «በእርሻው ውስጥ ስላለው እንክርዳድ የተነገረው ምሳሌ ምን ማለት እንደ ሆነ ግልጽ አድርገህ ንገረን» አሉት። ³⁷እርሱም እንዲህ ሲል መለሰ፦ «መልካሙን ዘር የሚዘራው የሰው ልጅ ነው። ³⁸እርሻው ዓለም ነው። መልካሙ ዘር የመንግሥቱ የሆኑትን ሰዎች፣ እንክርዳዱም የክፉው የሆኑትን ሰዎች ያመለክታል። ³⁹እንክርዳዱን የዘራው ጠላት ዲያብሎስ ነው። መከሩ የዘመኑ ፍጻሜ ነው፤ አጫጆቹም መላእክት ናቸው። ⁴⁰እንክርዳዱ ተሰብስቦ በእሳት ይቃጠላል፤ የዘመኑ ፍጻሜም እንደዚሁ ይሆናል። ⁴¹የሰው ልጅ መላእክቱን ይልካል፤ እነርሱም ሰዎችን ወደ ኃጢአት የሚመሩትን ነገሮች ሁሉና የእግዚአብሔርን ሕግ የሚጥሱትን ሁሉ ከመንግሥቱ ይለቅማሉ። ⁴²ወደሚነድደውም እቶን ይጥሏቸዋል፤ በዚያም ሰዎች ያለቅሳሉ፤ ጥርሳቸውንም ያፋጫሉ።

⁴³ጻድቃንም በዚያን ጊዜ በአባታቸው መንግሥት እንደ ፀሐይ ያንጸባርቃሉ። ጆሮ ያለው ሁሉ ያዳምጥ።

⁴⁴መንግሥተ ሰማያት በእርሻ ውስጥ የተቀበረን ሀብት ትመስላለች። አንድ ሰው አገኘውና መልሶ ሸፈነው። ከዚያም በደስታ ተሞልቶ ሄደ፤ ያለውን ሁሉ ሸጦ ያንን እርሻ ገዛ።

⁴⁵ደግሞም መንግሥተ ሰማያት ጥሩ ዕንቁዎችን የሚፈልግን ነጋዴ ትመስላለች። ⁴⁶እጅግ ከፍተኛ ዋጋ ያለው አንድ ዕንቁ ባገኘ ጊዜ ሄዶ ንብረቱን ሁሉ ሸጠና ገዛው።

⁴⁷ደግሞም መንግሥተ ሰማያት ወደ ሐይቁ ተጥሎ ከየዓይነቱ ዓሣ የሰበሰበን ትልቅ መረብ ትመስላለች። ⁴⁸በሞላም ጊዜ ወደ ሐይቁ ዳር ጎትተው አወጡት፤ ተቀምጠውም ጥሩዎቹን ዓሦች በቅርጫቶች ለዩ፤ የማይረቡትን ግን ጣሏቸው። ⁴⁹የዘመኑ ፍጻሜ እንዲህ ይሆናል። መላእክት ወጥተው ክፉዎችን ከጻድቃን መካከል ያስወጣሉ፤ ⁵⁰በሚነድደውም እቶን ውስጥ ይጥሏቸዋል። በዚያ ሰዎች ያለቅሳሉ፤ ጥርሳቸውንም ያፋጫሉ።

⁵¹ይህን ሁሉ ተረዳችሁ?»^e «አዎን» ብለው መለሱ። ⁵²እርሱም እንዲህ አላቸው፦ «ስለዚህ ለመንግሥተ ሰማያት ደቀ መዝሙር ሆኖ የሠለጠነ የሕግ መምህር ሁሉ ከሀብቱ ማከማቻ አዲሱንም አሮጌውንም የሚያወጣ የቤት ባለቤትን ይመስላል።» ⁵³ኢየሱስ እነዚህን ምሳሌዎች ተናግሮ በጨረሰ ጊዜ ከዚያ ተነሥቶ ሄደ። ⁵⁴ኢየሱስ ወደ ገዛ አገሩ መጥቶ በምኩራባቸው ሕዝቡን ማስተማር ጀመረ። እነርሱም በጣም ተደነቁ። «ይህ ሰው እንዲህ ያለውን ጥበብ ከየት አገኘው?» ብለው ጠየቁ፤ «እነዚህንስ የኃይል ሥራዎች? ⁵⁵ይህ የአናጺው ልጅ አይደለም? እናቱ ማርያም የምትባለዋ ሴት አይደለችምን? ወንድሞቹስ ያዕቆብ፣ ዮሴፍ፣ ስምዖንና ይሁዳ አይደሉምን?^{f 56}እኅቶቹስ ሁሉ እዚሁ በመካከላችን የሚኖሩ አይደሉምን? ታዲያ ይህን ሁሉ ከየት አገኘው?» ⁵⁷በእርሱም ተቀየሙ። ኢየሱስ ግን እንዲህ አላቸው፦ «ነቢያት ከገዛ አገራቸውና ከገዛ ቤተሰባቸው በቀር በየትም ቦታ ይከበራሉ።» ⁵⁸ስላላመኑ በዚያ ብዙ የኃይል ሥራዎች አላደረገም።