ማቴዎስ 28

¹ሰንበት አልፎ የሳምንቱ የመጀመሪያ ቀን ገና ሲነጋጋ መግደላዊት ማርያምና ሌላዋ ማርያም መቃብሩን ለማየት መጡ።^{a 2}ድንገት ምድር በኃይል ተናወጠች፤ የጌታ መልአክ ከሰማይ ወርዶ ነበርና። እርሱም ወደ ድንጋዩ ቀርቦ አንከባለለውና በላዩ ተቀመጠ። ³መልኩ እንደ መብረቅ ብልጭታ ነበር፤ ልብሱም እንደ በረዶ ነጭ ነበር። ⁴ጠባቂዎቹ እርሱን ፈርተው ተንቀጠቀጡ፤ እንደ ሞቱ ሰዎችም ሆኑ። ⁵መልአኩ ግን ሴቶቹን እንዲህ አላቸው፦ «እናንተ መፍራት አያስፈልጋችሁም። የተሰቀለውን ኢየሱስን እንደምትፈልጉ አውቃለሁ። ⁶እዚህ የለም። አስቀድሞ እንደ ተናገረው ተነሥቷል። ኑና የተኛበትን ቦታ እዩ።^{b 7}አሁንም ፈጥናችሁ ሂዱና ለደቀ መዛሙርቱ ይህን መልእክት ንገሩአቸው፦ “ከሙታን ተነሥቷል! ከእናንተ በፊት ወደ ገሊላ እየሄደ ነው፤ በዚያም ታዩታላችሁ።” መልእክቴ ይህ ነው።» ⁸ሴቶቹ ፈጥነው ከመቃብሩ ሄዱ። ለደቀ መዛሙርቱ ለመንገር ሲሮጡ ፍርሀትና ታላቅ ደስታ ሞልቶባቸው ነበር። ⁹ወዲያውም ኢየሱስ በመንገዳቸው ተገናኛቸው። «ሰላም ለእናንተ!» አላቸው። እነርሱም ወደ እርሱ ቀርበው እግሮቹን ያዙ፤ በፊቱም ተደፍተው ሰገዱለት። ¹⁰ከዚያም ኢየሱስ እንዲህ አላቸው፦ «አትፍሩ። ሂዱና ለወንድሞቼ መልእክት አድርሱ፤ ወደ ገሊላ ይሂዱ፤ በዚያም ያዩኛል።»

¹¹ሴቶቹ ገና በመንገድ ላይ ሳሉ ከጠባቂዎቹ ወታደሮች አንዳንዶቹ ወደ ከተማ ገቡ፤ የሆነውንም ሁሉ ለካህናት አለቆች በዝርዝር ነገሩ። ¹²የካህናት አለቆቹ ከሽማግሌዎች ጋር ተገናኝተው ምን እንደሚያደርጉ ከወሰኑ በኋላ ለወታደሮቹ ብዙ ገንዘብ ከፈሉ፤ ¹³የሚናገሩትንም ነገር ሰጡአቸው፦ «ለሰዎች፦ “እኛ ተኝተን ሳለን ደቀ መዛሙርቱ በሌሊት መጥተው ሰረቁት” በሉ። ¹⁴አገረ ገዡ ይህን ቢሰማ እኛ እናግባባዋለን፤ እናንተም የምትጨነቁበት ነገር እንዳይኖር እናደርጋለን።» ¹⁵ወታደሮቹም ገንዘቡን ወስደው እንደ ታዘዙት አደረጉ።

እስከ ዛሬ ድረስ በአይሁድ መካከል የሚወራው ወሬ ይህ ነው።

¹⁶አሥራ አንዱ ደቀ መዛሙርት ወደ ገሊላ፣ ኢየሱስ ወደ ቀጠራቸው ተራራ ሄዱ። ¹⁷በዚያም ባዩት ጊዜ ሰገዱለት፤ አንዳንዶቹ ግን ተጠራጠሩ።^{c 18}ኢየሱስም ወደ እነርሱ ቀርቦ እንዲህ አላቸው፦ «በሰማይና በምድር ያለው ሥልጣን ሁሉ በእጄ ተሰጥቷል። ¹⁹እንግዲህ ሂዱና አሕዛብን ሁሉ ደቀ መዛሙርት አድርጉ፤ በአብና በወልድ በመንፈስ ቅዱስም ስም አጥምቋቸው፤ ²⁰ያዘዝኋችሁንም ሁሉ እንዲጠብቁ አስተምሯቸው። ይህንንም አስታውሱ፤ እኔ ራሴ እስከ ዘመኑ ፍጻሜ ድረስ በየቀኑ ከእናንተ ጋር ነኝ።»^de