ማቴዎስ 5

¹ኢየሱስ ብዙ ሕዝብ ባየ ጊዜ ወደ ተራራው ላይ ወጣ። ተቀመጠም፤ ደቀ መዛሙርቱም ወደ እርሱ መጡ። ²እርሱም እንዲህ ብሎ ያስተምራቸው ጀመር፦ ³«በመንፈስ ድሆች የሆኑ የተባረኩ ናቸው፤ መንግሥተ ሰማያት የእነርሱ ናት። ⁴የሚያዝኑ የተባረኩ ናቸው፤ ይጽናናሉ። ⁵ገሮች የተባረኩ ናቸው፤ ምድርን ይወርሳሉ። ⁶ጽድቅን የሚራቡና የሚጠሙ የተባረኩ ናቸው፤ ይረካሉ። ⁷መሐሪዎች የተባረኩ ናቸው፤ ምሕረት ይደረግላቸዋል። ⁸ልባቸው ንጹሕ የሆነ የተባረኩ ናቸው፤ እግዚአብሔርን ያያሉ። ⁹ሰላምን የሚያወርዱ የተባረኩ ናቸው፤ የእግዚአብሔር ልጆች ይባላሉ። ¹⁰ስለ ጽድቅ የሚሳደዱ የተባረኩ ናቸው፤ መንግሥተ ሰማያት የእነርሱ ናት። ¹¹ሰዎች ስለ እኔ ብለው ሲሰድቧችሁ፣ ሲያሳድዷችሁና ልዩ ልዩ ክፉ ነገር በሐሰት ሲያወሩባችሁ የተባረካችሁ ናችሁ። ¹²ደስ ይበላችሁ፤ በደስታም ፈንጥዙ፤ በሰማይ ታላቅ ዋጋ ይጠብቃችኋልና። ከእናንተ በፊት የነበሩትን ነቢያትም ያሳደዷቸው በዚሁ መንገድ ነበር።

¹³እናንተ ለምድር ጨው ናችሁ። ጨው ግን ጣዕሙን ቢያጣ ጨዋማነቱን ምን ሊመልስለት ይችላል? ከዚያ በኋላ ወደ ውጭ ተጥሎ ከመረገጥ በስተቀር ምንም ጥቅም የለውም።

¹⁴እናንተ የዓለም ብርሃን ናችሁ። በኮረብታ ጫፍ ላይ የተሠራች ከተማ ልትደበቅ አትችልም። ¹⁵ማንም መብራት አብርቶ ከመስፈሪያ በታች አይደብቀውም፤ በመቅረዝ ላይ ይቀመጣል እንጂ፤ በዚያም በቤት ውስጥ ላሉት ሁሉ ያበራል። ¹⁶እንደዚሁም ብርሃናችሁ ሰዎች በሚያዩበት ይብራ፤ ይህም መልካም ሥራችሁን አይተው በሰማይ ላለው አባታችሁ ክብር እንዲሰጡ ነው።

¹⁷ሕግን ወይም ነቢያትን ለመሻር እንደ መጣሁ አትቁጠሩ። የመጣሁት ልፈጽማቸው እንጂ ልሽራቸው አይደለም።^{a 18}እውነት እላችኋለሁ፣ ሰማይና ምድር እስካሉ ድረስ፣ ሁሉም እስኪፈጸም ድረስ ከሕጉ አንዲት ትንሽ ፊደል ወይም የፊደል ቅንጣት እንኳ አትጠፋም። ¹⁹ስለዚህ ከእነዚህ ትእዛዛት ትንሿን እንኳ የሚያላላና ሌሎችም እንዲሁ እንዲያደርጉ የሚያስተምር በመንግሥተ ሰማያት ትንሹ ተብሎ ይጠራል። እነርሱን የሚጠብቅና የሚያስተምር ግን በመንግሥተ ሰማያት ታላቅ ተብሎ ይጠራል። ²⁰እላችኋለሁ፣ ጽድቃችሁ ከሕግ መምህራንና ከፈሪሳውያን ጽድቅ እጅግ ካልላቀ በቀር፣ ወደ መንግሥተ ሰማያት በፍጹም አትገቡም።

²¹ለአባቶቻችን “ነፍስ አትግደል፤ ነፍስ የሚገድል ሁሉ በፍርድ ቤት ይጠየቃል” እንደ ተባለ ሰምታችኋል። ²²እኔ ግን እላችኋለሁ፣ በወንድሙ ወይም በእኅቱ ላይ የሚቆጣ ሁሉ በፍርድ ቤት ይጠየቃል። ወንድሙን ወይም እኅቱን “አንተ ባዶ ራስ” የሚል በከፍተኛው ሸንጎ ፊት ይጠየቃል። “አንተ ሞኝ” የሚልም ሁሉ ወደ ገሃነም እሳት የመጣል አደጋ ይጠብቀዋል።^{b 23}ስለዚህ መባህን ወደ መሠዊያው ስታመጣ ወንድምህ ወይም እኅትህ በአንተ ላይ ቅሬታ እንዳለው ብታስታውስ፣ ²⁴መባህን በዚያው በመሠዊያው ፊት አስቀምጠው። ሄደህ አስቀድመህ ከዚያ ሰው ጋር ታረቅ፤ ከዚያም ተመልሰህ ስጦታህን አቅርብ። ²⁵አንድ ሰው ፍርድ ቤት ሊከስህ ቢወስድህ፣ ገና በመንገድ ላይ ሳላችሁ ፈጥነህ ከዚያ ሰው ጋር ተስማማ። አለዚያ ከሳሽህ ለዳኛው አሳልፎ ይሰጥሃል፤ ዳኛውም ለዘበኛው ይሰጥሃል፤ አንተም ወደ እስር ቤት ትጣላለህ። ²⁶እውነት እልሃለሁ፣ የመጨረሻዋን ሳንቲም እስክትከፍል ድረስ ከዚያ አትወጣም።

²⁷“አታመንዝር” የሚለውን ትእዛዝ ሰምታችኋል። ²⁸እኔ ግን እላችኋለሁ፣ ሴትን ለራሱ ሊያደርጋት በመመኘት የሚመለከት ወንድ በልቡ ከእርሷ ጋር አስቀድሞ አመንዝሯል። ²⁹ቀኝ ዓይንህ ወደ ኃጢአት ቢመራህ አውጥተህ አስወግደው። መላ ሰውነትህ ወደ ገሃነም ከሚጣል አንዱን የአካል ክፍልህን ብታጣ ይሻልሃል። ³⁰ቀኝ እጅህም ወደ ኃጢአት ቢመራህ ቆርጠህ አስወግደው። መላ ሰውነትህ ወደ ገሃነም ከሚሄድ አንዱን የአካል ክፍልህን ብታጣ ይሻልሃል።

³¹ደግሞም “ሚስቱን የሚያሰናብት ሰው የተጻፈ የፍቺ ማስረጃ ሊሰጣት ይገባል” ተብሏል። ³²እኔ ግን እላችኋለሁ፣ ሚስቱ ዝሙት ካልፈጸመች በቀር በሌላ ምክንያት የሚፈታት ወንድ እንድታመነዝር ያደርጋታል፤ የተፈታችን ሴት የሚያገባም ሁሉ ምንዝር ይፈጽማል።^c

³³ደግሞም ለአባቶቻችን “በሐሰት አትማል፤ በመሐላ ለጌታ የገባኸውን ቃል ፈጽም” እንደ ተባለ ሰምታችኋል። ³⁴እኔ ግን እላችኋለሁ፣ በምንም ዓይነት መሐላ አትማሉ፤ በሰማይ አትማሉ፣ የእግዚአብሔር ዙፋን ነውና፤^{d 35}በምድርም አትማሉ፣ የእግሩ ማሳረፊያ ናትና፤ በኢየሩሳሌምም አትማሉ፣ የታላቁ ንጉሥ ከተማ ናትና። ³⁶በገዛ ራስህም ቢሆን አትማል፤ ከጠጉርህ አንዲቱን እንኳ ማንጣት ወይም ማጥቆር አትችልምና። ³⁷አዎን ስትሉ አዎን፣ አይደለም ስትሉም አይደለም ይሁን። ከዚህ በላይ የምትጨምሩት ሁሉ ከክፉው ይመጣል።^e

³⁸“ዓይን ስለ ዓይን፣ ጥርስ ስለ ጥርስ” የሚለውን አባባል ሰምታችኋል። ³⁹እኔ ግን እላችኋለሁ፣ በክፉ ሰው ላይ አጸፋ አትመልሱ። ማንም ቀኝ ጉንጭህን በጥፊ ቢመታህ ሌላውንም ጉንጭህን ለዚያ ሰው አዙር።^{f 40}አንድ ሰው ፍርድ ቤት ከስሶ ሸሚዝህን ሊወስድ ቢፈልግ ካባህንም ደግሞ ለዚያ ሰው ተው። ⁴¹ማንም ጭነት ተሸክመህ አንድ ማይል እንድትሄድ ቢያስገድድህ ከዚያ ሰው ጋር ሁለት ማይል ሂድ። ⁴²ለሚጠይቅህ ሁሉ ስጥ፤ ከአንተ ሊበደር ለሚፈልግ ሰውም ጀርባህን አትስጠው።

⁴³“ባልንጀራህን ውደድ፤ ጠላትህን ጥላ” የሚለውን አባባል ሰምታችኋል። ⁴⁴እኔ ግን እላችኋለሁ፦ ጠላቶቻችሁን ውደዱ፤ ስለሚያሳድዷችሁም ሰዎች ጸልዩ፣^{g 45}ይህም በሰማይ ያለው የአባታችሁ ልጆች እንድትሆኑ ነው። እርሱ ፀሐዩን በክፉዎችና በደጎች ላይ እኩል ያወጣል፤ ትክክል በሚያደርጉትና ስሕተት በሚያደርጉት ላይም ዝናብ ያዘንባል። ⁴⁶የሚወዷችሁን ሰዎች ብትወዱ በዚህ ምን ዋጋ ታገኛላችሁ? ቀራጮች እንኳ ይህን ያደርጋሉ፤ አይደለም እንዴ? ⁴⁷የገዛ ወንድሞቻችሁንና እኅቶቻችሁን ብቻ ሰላም ብትሉ ከሌሎች ሰዎች የተለየ ምን ታደርጋላችሁ? አሕዛብ እንኳ ይህን ያደርጋሉ፤ አይደለም እንዴ? ⁴⁸እንግዲህ የሰማዩ አባታችሁ ፍጹም እንደ ሆነ እናንተም ፍጹማን መሆን አለባችሁ።^h