ማቴዎስ 24

¹ኢየሱስ ከቤተ መቅደሱ ወጥቶ በመንገዱ ሲሄድ ደቀ መዛሙርቱ የቤተ መቅደሱን ሕንፃዎች ሊያሳዩት ቀረቡ። ²እርሱም መልሶ እንዲህ አላቸው፦ «ይህን ሁሉ ታያላችሁ፣ አይደለም? እውነት እላችኋለሁ፣ እዚህ ያለው ድንጋይ ሁሉ ይፈርሳል፤ በሌላው ድንጋይ ላይ ተቀምጦ የሚቀር አንድም ድንጋይ አይኖርም።»

³ከዚያም በደብረ ዘይት ተቀምጦ ሳለ ደቀ መዛሙርቱ ለብቻቸው ወደ እርሱ መጥተው እንዲህ አሉት፦ «ይህ መቼ እንደሚፈጸም ንገረን። የአንተን መምጣትና የዘመኑን መዝጊያ የሚያመለክተው ምልክት ምንድን ነው?» ⁴ኢየሱስም እንዲህ ሲል መለሰላቸው፦ «ማንም እንዳያሳስታችሁ ተጠበቁ። ⁵ብዙዎች በስሜ እየመጡ “እኔ ክርስቶስ ነኝ” ይላሉ፤ ብዙዎችንም ያሳስታሉ። ⁶ስለ ጦርነቶችና ስለ ጦርነቶች ወሬ ትሰማላችሁ። እንዳትናወጡ ተጠንቀቁ። እነዚህ ነገሮች መሆን አለባቸው፤ ይህ ግን ፍጻሜው ደርሷል ማለት አይደለም። ⁷ሕዝብ ከሕዝብ ጋር፣ መንግሥትም ከመንግሥት ጋር ይዋጋል። በየቦታው ራብና የመሬት መንቀጥቀጥ ይከሰታል። ⁸ይሁን እንጂ ይህ ሁሉ የምጡ መጀመሪያ ብቻ ነው።

⁹በዚያን ጊዜ ለጭካኔ መከራ አሳልፈው ይሰጧችኋል፤ ይገድሏችኋልም፤ ስለ ስሜም ሕዝቦች ሁሉ ይጠሏችኋል። ¹⁰በዚያን ጊዜ ብዙዎች ከእምነታቸው ይወድቃሉ፤ አንዱ ሌላውን አሳልፎ ይሰጣል፤ እርስ በርሳቸውም ይጠላላሉ። ¹¹ብዙ ሐሰተኛ ነቢያት ይነሣሉ፤ ብዙዎችንም ያሳስታሉ። ¹²ዓመፅ እየተስፋፋ ሲሄድ የአብዛኞቹ ሰዎች ፍቅር ይቀዘቅዛል። ¹³እስከ ፍጻሜ ድረስ ጸንቶ የሚቆም ግን ይድናል። ¹⁴ይህ የመንግሥቱ ወንጌል ሕዝቦች ሁሉ ምስክርነቱን እንዲሰሙ በዓለም ሁሉ ይታወጃል፤ ከዚያ በኋላ ብቻ ፍጻሜው ይመጣል።

¹⁵ስለዚህ ነቢዩ ዳንኤል የተናገረለትን፣ ጥፋት የሚያመጣውን አስጸያፊ ነገር በቅዱሱ ስፍራ ቆሞ ስታዩ (አንባቢው ልብ ይበል)፣ ¹⁶በይሁዳ ያሉ ሰዎች ወደ ኮረብቶች ሸሽተው ያምልጡ። ¹⁷በጣሪያ ላይ ያለ ማንም ሰው ከቤቱ ዕቃ ለማውጣት አይውረድ፤ ¹⁸በእርሻ ያለም ማንም ሰው ካባውን ለመውሰድ ወደ ኋላ አይመለስ።^{a 19}በእነዚያ ቀኖች ላረገዙ ሴቶችና ሕፃናትን ለሚያጠቡ ወዮላቸው! ²⁰በክረምት ወይም በሰንበት ቀን መሸሽ እንዳይገጥማችሁ ጸልዩ። ²¹ያ ጊዜ የታላቅ ጭንቀት ጊዜ ይሆናልና፤ ዓለም ከተፈጠረ ጀምሮ ከሆነው ሁሉ የከፋ ይሆናል፤ እንደ እርሱም ያለ ዳግመኛ ፈጽሞ አይሆንም። ²²እነዚያ ቀኖች ባይቀነሱ ኖሮ አንድም ሰው በሕይወት ባልተረፈ ነበር። ነገር ግን ስለ ተመረጡት ሲባል ይቀነሳሉ። ²³ያን ጊዜ ማንም “እነሆ፣ ክርስቶስ እዚህ ነው!” ወይም “እርሱ እዚህ ነው!” ቢላችሁ አትመኑ። ²⁴ክርስቶስ ነን ብለው በሐሰት የሚናገሩ ሰዎችና ከእነርሱም ጋር ሐሰተኛ ነቢያት ይነሣሉ። ቢቻል የተመረጡትን እንኳ ለማሳሳት የሚበቁ ታላላቅ ምልክቶችንና ድንቆችን ያደርጋሉ። ²⁵ይህን አስተውሉ፤ አስቀድሜ አስጠንቅቄአችኋለሁ። ²⁶ስለዚህ “እነሆ፣ በምድረ በዳ ነው” ቢሏችሁ ካላችሁበት አትንቀሳቀሱ። “እነሆ፣ በቤት ውስጥ ተሸሽጓል” ቢሏችሁም አትመኑ። ²⁷የሰው ልጅ መምጣት በምሥራቅ ብልጭ ብሎ እስከ ምዕራብ ድረስ ሰማዩን እንደሚያበራ መብረቅ ይሆናል። ²⁸ሬሳ ባለበት ቦታ ጥንብ አንሳዎች ይከማቻሉ።^b

²⁹ከእነዚያ ቀኖች ጭንቀት በኋላ ወዲያው ፀሐይ ትጨልማለች፤ ጨረቃም ማብራቷን ታቆማለች። ከዋክብት ከሰማይ ይረግፋሉ፤ የሰማያትም ኃይሎች ይንቀጠቀጣሉ። ³⁰ከዚያም የሰው ልጅ ምልክት በሰማይ ይገለጣል። በምድር ያሉ ነገዶች ሁሉ ያለቅሳሉ፤ የሰው ልጅንም በኃይልና በታላቅ ክብር በሰማይ ደመናዎች ላይ ሲመጣ ያዩታል። ³¹ታላቅ መለከት ሲነፋ መላእክቱን ይልካል። እነርሱም የመረጣቸውን ከአራቱ ነፋሳት፣ ከሰማያት ጫፍ እስከ ጫፍ ይሰበስባሉ።

³²ከበለስ ትምህርት ውሰዱ። ቅርንጫፎቿ ሲለሰልሱና ቅጠሎቿ ማቆጥቆጥ ሲጀምሩ በጋ ሩቅ እንዳልሆነ ታውቃላችሁ። ³³እናንተም እንደዚሁ ናችሁ፤ ይህን ሁሉ ስታዩ፣ ቅርብ እንደ ሆነና በደጅ እንደ ቆመ እርግጠኞች ሁኑ።^{c 34}እውነት እላችኋለሁ፣ ይህ ትውልድ ከማለፉ በፊት ይህ ሁሉ ይፈጸማል።^{d 35}ሰማይና ምድር ያልፋሉ፤ ቃሎቼ ግን ከቶ አያልፉም።

³⁶ያ የሚሆንበትን ቀንና ሰዓት ማንም አያውቅም። በሰማይ ያሉ መላእክት አያውቁትም፤ ወልድም አያውቀውም። የሚያውቀው አብ ብቻ ነው።^{e 37}የሰው ልጅ መምጣት የኖኅን ዘመን ይመስላል። ³⁸ከጥፋት ውኃ በፊት ሰዎች ኖኅ ወደ መርከቡ እስከ ገባበት ቀን ድረስ ይበሉና ይጠጡ ነበር፤ ራሳቸውም ያገቡ፣ ልጆቻቸውንም ይድሩ ነበር። ³⁹የጥፋት ውኃ መጥቶ ሁሉንም ጠራርጎ እስኪወስዳቸው ድረስ የሚመጣውን ነገር አላወቁም። የሰው ልጅ መምጣትም እንደዚሁ ይሆናል። ⁴⁰በዚያን ጊዜ ሁለት ሰዎች በእርሻ ውስጥ ይሠራሉ፤ አንዱ ይወሰዳል፣ ሌላው ይተዋል። ⁴¹ሁለት ሴቶች በወፍጮ እህል ይፈጫሉ፤ አንዲቱ ትወሰዳለች፣ ሌላይቱ ትተዋለች። ⁴²ስለዚህ ነቅታችሁ ጠብቁ፤ ጌታችሁ የሚመጣበትን ቀን አታውቁምና። ⁴³ይህን አስቡት፤ የቤት ባለቤት ሌባ በሌሊቱ በየትኛው ሰዓት እንደሚመጣ ቢያውቅ ነቅቶ ይጠብቅ ነበር፤ ማንም የቤቱን ግድግዳ ቆፍሮ እንዲገባ አይፈቅድም ነበር። ⁴⁴ስለዚህ እናንተም ተዘጋጁ፤ የሰው ልጅ ፈጽሞ ባልገመታችሁት ሰዓት ይመጣልና።

⁴⁵ታዲያ ጌታው በቤቱ አገልጋዮች ላይ ኃላፊ አድርጎ የሾመውና ምግባቸውን በሰዓቱ የሚሰጣቸው፣ ታማኝና አስተዋይ አገልጋይ ማን ነው? ⁴⁶ጌታው በሚመጣበት ጊዜ በዚሁ ሥራ ላይ ቢያገኘው ያ አገልጋይ የተባረከ ይሆናል። ⁴⁷እውነት እላችኋለሁ፣ ጌታው ባለው ነገር ሁሉ ላይ ኃላፊ ያደርገዋል። ⁴⁸ያ አገልጋይ ግን ክፉ ሊሆን ይችላል። በልቡ “ጌታዬ ሳይመጣ ብዙ ጊዜ ይቆያል” ብሎ ያስብ ይሆናል፤ ⁴⁹ባልንጀሮቹን አገልጋዮች መደብደብ ይጀምራል፤ ከሰካራሞችም ጋር ይበላል፤ ይጠጣልም። ⁵⁰እንደዚህ ከሆነ ጌታው ባልጠበቀው ቀንና ባላወቀው ሰዓት ይመጣል። ⁵¹ጌታውም ቆራርጦ ከግብዞች ጋር ያደርገዋል፤ በዚያም ሰዎች ያለቅሳሉ፤ ጥርሳቸውንም ያፋጫሉ።^f