ማቴዎስ 22

¹ኢየሱስ እንደገና በምሳሌዎች ተናግሮ መለሰላቸው፦ ²«በመንግሥተ ሰማያት የሚሆነው ነገር እንዲህ ሊመሰል ይችላል፤ አንድ ንጉሥ ለልጁ የሰርግ ግብዣ አዘጋጀ። ³ቀድሞ የተጋበዙትን እንግዶች እንዲጠሩ ባሪያዎቹን ላከ፤ እነርሱ ግን ለመምጣት እምቢ አሉ። ⁴ስለዚህ ሌሎች ባሪያዎችን እንዲህ ብሎ ላከ፦ “እንግዶቹን እንዲህ በሏቸው፦ ‘እነሆ፣ ግብዣዬ ተዘጋጅቷል። ኮርማዎቼና የሰቡ ጥጆቼ ታርደዋል። ሁሉም ነገር ተዘጋጅቷልና ወደ ሰርጉ ኑ።’” ⁵እንግዶቹ ግን ግድ አልሰጣቸውም። አንዱ ወደ እርሻው፣ ሌላውም ወደ ንግዱ ሄደ። ⁶የቀሩት ደግሞ የንጉሡን ባሪያዎች ይዘው አዋረዷቸው፤ ገደሏቸውም። ⁷ንጉሡ እጅግ ተቆጣ። ወታደሮቹን ልኮ እነዚያን ነፍሰ ገዳዮች አጠፋቸው፤ ከተማቸውንም በእሳት አቃጠለ።^{a 8}ከዚያም ባሪያዎቹን እንዲህ አላቸው፦ “ሰርጉ ተዘጋጅቷል፤ የጋበዝኳቸው እንግዶች ግን ለመምጣት የሚገባቸው አልነበሩም። ⁹ስለዚህ መንገዶቹ ከከተማ ወደሚወጡበት ሂዱ፤ ያገኛችሁትንም ሁሉ ወደ ሰርጉ ጋብዙ።” ¹⁰ባሪያዎቹም ወደ መንገዶቹ ወጥተው ክፉዎችንም ደጎችንም ያገኙትን ሁሉ ሰበሰቡ፤ የሰርጉም አዳራሽ በእንግዶች ተሞላ። ¹¹ንጉሡም እንግዶቹን ለማየት ገባ፤ በመካከላቸውም የሰርግ ልብስ ያልለበሰ አንድ ሰው አየ።^{b 12}“ወዳጄ፣ የሰርግ ልብስ ሳትለብስ እንዴት ወደዚህ ልትገባ ቻልክ?” አለው። ሰውየውም የሚለው አጣ። ¹³ንጉሡም አገልጋዮቹን እንዲህ ሲል አዘዘ፦ “እጁንና እግሩን አስራችሁ ወደ ውጭ ጨለማ ጣሉት፤ በዚያ ሰዎች ያለቅሳሉ፤ ጥርሳቸውንም ያፋጫሉ።” ¹⁴የተጠሩት ብዙዎች፣ የተመረጡት ግን ጥቂቶች ናቸውና።»

¹⁵ከዚያም ፈሪሳውያን ሄደው ኢየሱስን በገዛ ቃሉ እንዴት እንደሚያጠምዱት ተመካከሩ። ¹⁶ደቀ መዛሙርታቸውን ከሄሮድስ ወገኖች ጋር ወደ እርሱ ላኩ። «መምህር ሆይ» አሉት፤ «አንተ እውነተኛ እንደ ሆንህና የእግዚአብሔርን መንገድ በእውነት እንደምታስተምር እናውቃለን። የማንም ሰው አስተያየት አያንቀሳቅስህም፤ ሰዎችን በማዕረጋቸው አታዳላምና። ¹⁷ስለዚህ አስተያየትህን ንገረን። ለቄሳር የነፍስ ወከፍ ግብር መክፈል በሕግ የተፈቀደ ነው ወይስ አይደለም?» ¹⁸ኢየሱስ ክፋታቸውን ተረዳ። «እናንተ ግብዞች» አላቸው፤ «ለምን ትፈታተኑኛላችሁ? ¹⁹ግብሩ የሚከፈልበትን ሳንቲም አሳዩኝ።» እነርሱም የአንድ ቀን ደመወዝ የሚያህል የብር ሳንቲም አመጡለት። ²⁰እርሱም «ይህ የማን መልክ ነው? በላዩስ የተጻፈው የማን ማዕረግ ነው?» ብሎ ጠየቃቸው። ²¹«የቄሳር ነው» ብለው መለሱለት። እርሱም «እንግዲያውስ ለቄሳር የሚገባውን ለቄሳር ክፈሉ፤ ለእግዚአብሔርም የሚገባውን ለእግዚአብሔር ክፈሉ» አላቸው። ²²በመልሱም እጅግ ተደነቁ፤ ትተውትም ሄዱ።

²³በዚያው ቀን ትንሣኤ የለም የሚሉ አንዳንድ ሰዱቃውያን ጥያቄ ይዘው ወደ እርሱ መጡ። ²⁴«መምህር ሆይ» አሉት፣ «ሙሴ ይህን ደንብ ሰጥቷል፦ “አንድ ሰው ልጆች ሳይተው ቢሞት፣ ወንድሙ የሞተውን ሰው ሚስት አግብቶ ለሟቹ ወንድሙ ዘር ይተካለት።” ²⁵በመካከላችን ሰባት ወንድማማቾች ነበሩ። የመጀመሪያው አግብቶ ሞተ፤ ልጆችም ስላልነበሩት ሚስቱ ለወንድሙ ሆነች። ²⁶በሁለተኛውም፣ በሦስተኛውም ወንድም ላይ እንዲሁ ሆነ፤ እስከ ሰባቱም ድረስ እንዲሁ ቀጠለ። ²⁷በመጨረሻም፣ ከሁሉም በኋላ ሴቲቱ ሞተች። ²⁸ታዲያ ሙታን በሚነሡበት ጊዜ ከሰባቱ የትኛው ሚስት ትሆናለች? ሁሉም አግብተዋት ነበርና።»

²⁹ኢየሱስም እንዲህ ሲል መለሰላቸው፦ «መጻሕፍትንም ሆነ የእግዚአብሔርን ኃይል ስለማታስተውሉ ከእውነት ርቃችኋል። ³⁰ሙታን ከተነሡ በኋላ ወንዶች ሚስት አያገቡም፤ ሴቶችም ለባል አይዳሩም፤ በሰማይ እንዳሉት እንደ እግዚአብሔር መላእክት ናቸው።^{c 31}ስለ ሙታን መነሣት ደግሞ፣ እግዚአብሔር ለእናንተ የተናገረውን አላነበባችሁምን? እንዲህ ብሏል፦ ³²“እኔ የአብርሃም አምላክ፣ የይስሐቅ አምላክና የያዕቆብ አምላክ ነኝ።” እርሱ የሙታን አምላክ አይደለም፤ የሕያዋን አምላክ ነው።» ³³ትምህርቱን የሰሙት ሕዝብ በጣም ተደነቁ።

³⁴ፈሪሳውያንም ኢየሱስ ሰዱቃውያንን ዝም እንዳሰኛቸው ሰሙ፤ በአንድ ስፍራም ተሰበሰቡ። ³⁵ከመካከላቸውም የሕግ አዋቂ የሆነ አንድ ሰው ሊፈትነው ፈልጎ እንዲህ ሲል ጠየቀው፦ ³⁶«መምህር ሆይ፣ በሕጉ ውስጥ ከሁሉ የሚበልጠው ትእዛዝ የትኛው ነው?» ³⁷ኢየሱስም እንዲህ ሲል መለሰለት፦ «“ጌታ አምላክህን በሙሉ ልብህ፣ በሙሉ ነፍስህና በሙሉ አእምሮህ ውደድ።” ³⁸ይህ ትእዛዝ ታላቅ ነው፤ ከሁሉም የመጀመሪያው ነው።

³⁹ሁለተኛውም ትእዛዝ ከዚሁ ጋር አንድ ዓይነት ነው፦ “ራስህን እንደምትወድ ባልንጀራህን ውደድ።” ⁴⁰ሕጉ ሁሉ፣ ነቢያትም ጭምር፣ በእነዚህ በሁለቱ ትእዛዛት ላይ ተንጠልጥለዋል።»

⁴¹ፈሪሳውያን በዚያ ተሰብስበው ሳሉ ኢየሱስ አንድ ጥያቄ አቀረበላቸው፦ ⁴²«ስለ ክርስቶስ ያላችሁ አመለካከት ምንድን ነው? የማን ልጅ ነው?» እነርሱም «የዳዊት» ብለው መለሱለት። ⁴³እርሱም እንዲህ ሲል ጠየቃቸው፦ «ታዲያ ዳዊት በመንፈስ ተመርቶ እንዴት ጌታ ብሎ ይጠራዋል? ዳዊት እንዲህ ብሏልና፦ ⁴⁴“ጌታ ጌታዬን፦ ‘ጠላቶችህን ከእግርህ በታች እስካደርግልህ ድረስ በቀኝ እጄ ተቀመጥ’ አለው።”^{d 45}ዳዊት “ጌታ” ብሎ ከጠራው፣ እንዴት የዳዊት ልጅ ሊሆን ይችላል?» ⁴⁶ከእነርሱ ማንም ምንም መልስ ሊሰጠው አልቻለም። ከዚያ ቀን ወዲያም ሌላ ጥያቄ ሊጠይቀው የደፈረ ማንም አልነበረም።