ማቴዎስ 10

¹ኢየሱስ አሥራ ሁለቱን ደቀ መዛሙርቱን ወደ ራሱ ጠራ፤ ርኩሳን መናፍስትን የማስወጣትና ማንኛውንም በሽታና ሕመም የመፈወስ ሥልጣን ሰጣቸው። ²የአሥራ ሁለቱ ሐዋርያት ስሞች እነዚህ ናቸው፤ በመጀመሪያ ጴጥሮስ የሚባለው ስምዖንና ወንድሙ እንድርያስ፤ ከዚያም የዘብዴዎስ ልጅ ያዕቆብና ወንድሙ ዮሐንስ፤ ³ፊልጶስና በርተሎሜዎስ፤ ቶማስና ቀራጩ ማቴዎስ፤ የእልፍዮስ ልጅ ያዕቆብና ታዴዎስ፤ ⁴ቀነናዊው ስምዖንና እርሱን አሳልፎ የሰጠው የአስቆሮቱ ይሁዳ።^a

⁵ኢየሱስ እነዚህን አሥራ ሁለቱን ላከ፤ እንዲህም ሲል አዘዛቸው፦ «ወደ አሕዛብ አገር ከሚወስዱ መንገዶች ራቁ፤ ወደ የትኛውም የሳምራውያን ከተማ አትግቡ። ⁶ከዚህ ይልቅ የጠፉ በጎች ወደ ሆኑት ወደ እስራኤል ሕዝብ ሂዱ። ⁷በምትሄዱበት ሁሉ “መንግሥተ ሰማያት ቀርባለች” ብላችሁ ስበኩ። ⁸የታመሙትን ፈውሱ፤ የሞቱትን አስነሡ፤ ለምጽ ያለባቸውን አንጹ፤ አጋንንትን አስወጡ። ያለ ክፍያ ተቀበላችሁ፤ ያለ ክፍያም ስጡ።^{b 9}ለመቀነታችሁ ገንዘብ አትያዙ፤ ወርቅም ቢሆን ብርም ቢሆን ናስም ቢሆን። ¹⁰ለመንገድ ስልቻ፣ ተጨማሪ እጀ ጠባብ፣ ጫማ ወይም በትር አትያዙ። ሠራተኛ ምግቡን ሊያገኝ ይገባዋል። ¹¹ወደ አንድ ከተማ ወይም መንደር በገባችሁ ጊዜ በዚያ ያለውን ብቁ ሰው ጠይቃችሁ ፈልጉ፤ ከዚያ ስፍራ እስክትሄዱም ድረስ በእርሱ ቤት ቆዩ። ¹²ወደ ቤት ስትገቡ ለቤተሰቡ ሰላምታ አቅርቡ። ¹³ያ ቤተሰብ ብቁ ቢሆን ሰላማችሁ በእርሱ ላይ ይረፍ። ብቁ ባይሆን ግን የሰጣችሁት ሰላም ወደ እናንተ ይመለስ። ¹⁴አንዳንዶች አይቀበሏችሁም፤ መልእክታችሁንም አይሰሙም። ያን ቤት ወይም ያችን ከተማ ለቅቃችሁ ስትወጡ ከእግራችሁ ላይ አቧራውን አራግፉ። ¹⁵እውነት እላችኋለሁ፤ በፍርድ ቀን የሰዶምና የገሞራ አገር ከዚያች ከተማ የተሻለ ይሆንላታል።

¹⁶አስታውሱ፤ የምልካችሁ እኔ ነኝ፤ በተኩላዎች እንደ ተከበቡ በጎች ትሆናላችሁ። ስለዚህ እንደ እባብ ብልሆች፣ እንደ ርግብም ጉዳት የማታደርሱ ሁኑ። ¹⁷ከሰዎች ተጠንቀቁ። ለአካባቢ ሸንጎዎች አሳልፈው ይሰጧችኋል፤ በምኩራቦቻቸውም ይገርፏችኋል። ¹⁸በእኔ ምክንያት በገዢዎችና በነገሥታት ፊት እንድትቆሙ ይወስዷችኋል። በዚያም ለእነርሱና ለአሕዛብ ትመሰክራላችሁ። ¹⁹አሳልፋችሁ በተሰጣችሁ ጊዜ ግን እንዴት እንደምትመልሱ ወይም ምን እንደምትሉ አትጨነቁ። በዚያች ሰዓት የምትናገሩት ቃል ይሰጣችኋል። ²⁰ተናጋሪዎቹ እናንተ አትሆኑም፤ በእናንተ ውስጥ ሆኖ የሚናገረው የአባታችሁ መንፈስ ነው። ²¹ወንድም ወንድሙን እንዲገደል አሳልፎ ይሰጣል፤ አባትም የገዛ ልጁን እንዲሁ። ልጆች በወላጆቻቸው ላይ ይነሣሉ፤ እንዲገደሉም ያደርጓቸዋል። ²²ሁሉም በስሜ ምክንያት ይጠሏችኋል። እስከ መጨረሻው ጸንቶ የሚቆም ግን ይድናል። ²³በአንዲቱ ከተማ ቢያሳድዷችሁ ወደ ሌላይቱ አምልጡ። እውነት እላችኋለሁ፤ በእስራኤል ከተሞች ሥራችሁን ሳትፈጽሙ የሰው ልጅ ይመጣል።^c

²⁴ማንም ደቀ መዝሙር ከመምህሩ በማዕረግ አይበልጥም፤ ማንም ባሪያ ከጌታው አይበልጥም። ²⁵ለደቀ መዝሙር እንደ መምህሩ መሆን ይበቃዋል፤ ለባሪያም እንደ ጌታው መሆን ይበቃዋል። የቤቱን አባወራ ብዔልዜቡል ብለው ከጠሩት፣ የቤተሰቡን አባላት ምን ያህል አብልጠው ይሰድቧቸው ይሆን!^d

²⁶ስለዚህ አትፍሯቸው። አሁን የተሸፈነው ሁሉ ይገለጣል፤ የተደበቀውም ሁሉ ወደ ብርሃን ይወጣል። ²⁷በጨለማ የምነግራችሁን በግልጽ ተናገሩት፤ በሹክሹክታ የምትሰሙትን ከጣሪያ ላይ ሆናችሁ አውጁት። ²⁸አካልን የሚገድሉ ነፍስን ለመግደል ኃይል የላቸውም፤ ስለዚህ አትፍሯቸው። ይልቁንስ ነፍስንም አካልንም በገሃነም ሊያጠፋ የሚችለውን ፍሩ። ²⁹ሁለት ድንቢጦች ከአንድ ሰዓት ደመወዝ ባነሰ ዋጋ ይሸጡ የለምን? ይሁን እንጂ ከእነርሱ አንዷ እንኳ ያለ አባታችሁ ወደ መሬት አትወድቅም። ³⁰ስለ እናንተ ደግሞ የራሳችሁ ጠጉር እንኳ አንድ በአንድ ተቆጥሯል። ³¹ስለዚህ አትፍሩ፤ እናንተ ከብዙ የድንቢጥ መንጋ ይበልጥ ዋጋ አላችሁ።

³²ስለዚህ በሰዎች ፊት የእኔ መሆኑን በግልጽ የሚመሰክር ሁሉ፣ እኔም በሰማይ ባለው አባቴ ፊት የእኔ መሆኑን እመሰክራለሁ። ³³በሰዎች ፊት የሚክደኝ ሰው ሁሉ፣ በሰማይ ባለው አባቴ ፊት እኔም እክደዋለሁ።

³⁴መምጣቴ በምድር ላይ ሰላምን ለማምጣት እንደ ሆነ አድርጋችሁ አትቁጠሩ። የመጣሁት ሰይፍን ለማምጣት ነው፤ ሰላምን አይደለም። ³⁵መምጣቴ ወንድ ልጅን ከአባቱ፣ ሴት ልጅን ከእናቷ፣ ምራትንም ከአማቷ ይለያያል። ³⁶የሰው ጠላቶች የገዛ ቤተሰቡ ይሆናሉ። ³⁷አባቱን ወይም እናቱን ከእኔ አስበልጦ የሚወድ ለእኔ ብቁ አይደለም፤ ወንድ ልጁን ወይም ሴት ልጁን ከእኔ አስበልጦ የሚወድ ለእኔ ብቁ አይደለም። ³⁸የራሱን መስቀል አንሥቶ ከኋላዬ ለመሄድ እምቢ የሚል ለእኔ ብቁ አይደለም። ³⁹ሕይወቱን ለራሱ የሚያስጠብቅ ያጣዋል፤ ስለ እኔ ብሎ ሕይወቱን የሚያጣ ግን ያገኘዋል።

⁴⁰እናንተን መቀበል እኔን መቀበል ነው፤ እኔን መቀበልም የላከኝን መቀበል ነው። ⁴¹ነቢይን ነቢይ ስለ ሆነ የሚቀበል የነቢይ ዋጋ ይሰጠዋል፤ ጻድቅን ጻድቅ ስለ ሆነ የሚቀበል የጻድቅ ዋጋ ይሰጠዋል። ⁴²ደቀ መዝሙር በመሆኑ ብቻ ከእነዚህ ትንንሾች ለአንዱ አንድ ጽዋ ቀዝቃዛ ውኃ እንኳ የሚሰጥ ሰው፣ እውነት እላችኋለሁ፣ ዋጋውን ፈጽሞ አያጣም።»