ማቴዎስ 1

¹የዳዊት ልጅ፣ የአብርሃም ልጅ የሆነው የኢየሱስ ክርስቶስ የዘር ሐረግ መዝገብ ይህ ነው።^{a 2}አብርሃም የይስሐቅ አባት ነበረ፤ ይስሐቅ የያዕቆብ፣ ያዕቆብም የይሁዳና የወንድሞቹ አባት ነበረ። ³ይሁዳ ከትዕማር የፋሬስና የዛራ አባት ሆነ። ፋሬስ የኤስሮም፣ ኤስሮምም የአራም አባት ነበረ። ⁴አራም የአሚናዳብ፣ አሚናዳብ የነአሶን፣ ነአሶንም የሰልሞን አባት ነበረ። ⁵ሰልሞን ከረዓብ የቦዔዝ አባት ሆነ። ቦዔዝ ከሩት የኢዮቤድ አባት ሆነ። ኢዮቤድ የእሴይ አባት ነበረ፤ ⁶እሴይም የንጉሥ ዳዊት አባት ነበረ። ዳዊት ከኦርዮ ሚስት የሰሎሞን አባት ሆነ። ⁷ሰሎሞን የሮብዓም፣ ሮብዓም የአብያ፣ አብያም የአሳ አባት ነበረ። ⁸አሳ የኢዮሣፍጥ፣ ኢዮሣፍጥ የኢዮራም፣ ኢዮራምም የዖዝያን አባት ነበረ። ⁹ዖዝያን የኢዮአታም፣ ኢዮአታም የአካዝ፣ አካዝም የሕዝቅያስ አባት ነበረ። ¹⁰ሕዝቅያስ የምናሴ፣ ምናሴ የአሞን፣ አሞንም የኢዮስያስ አባት ነበረ። ¹¹ኢዮስያስ ወደ ባቢሎን በተደረገው ግዞት ጊዜ የኢኮንያንና የወንድሞቹ አባት ነበረ።^bc

¹²ወደ ባቢሎን ከተደረገው ግዞት በኋላ ኢኮንያን የሰላትያል፣ ሰላትያልም የዘሩባቤል አባት ነበረ። ¹³ዘሩባቤል የአብዩድ፣ አብዩድ የኤልያቄም፣ ኤልያቄምም የአዛር አባት ነበረ። ¹⁴አዛር የሳዶቅ፣ ሳዶቅ የአኪም፣ አኪምም የኤልዩድ አባት ነበረ። ¹⁵ኤልዩድ የአልዓዛር፣ አልዓዛር የማታን፣ ማታንም የያዕቆብ አባት ነበረ። ¹⁶ያዕቆብ የማርያም ባል የዮሴፍ አባት ነበረ፤ ክርስቶስ የሚባለው ኢየሱስም ከማርያም ተወለደ።

¹⁷ስለዚህ ከአብርሃም እስከ ዳዊት በአጠቃላይ አሥራ አራት ትውልድ፣ ከዳዊት እስከ ባቢሎን ግዞት አሥራ አራት ትውልድ፣ ከባቢሎን ግዞት እስከ ክርስቶስ ደግሞ አሥራ አራት ትውልድ ነበረ።^d

¹⁸ኢየሱስ ክርስቶስ የተወለደው እንዲህ ነው። እናቱ ማርያም ለዮሴፍ ታጭታ ነበር፤ ነገር ግን አብረው መኖር ከመጀመራቸው በፊት በመንፈስ ቅዱስ ልጅ እንደ ፀነሰች ታወቀ። ¹⁹ባሏ ዮሴፍ ጻድቅ ሰው ነበረ፤ በሕዝብ ፊትም ሊያዋርዳት አልፈለገም፤ ስለዚህ በስውር ሊፈታት ወሰነ። ²⁰ይህን በልቡ ሲያወጣና ሲያወርድ ሳለ የጌታ መልአክ በሕልም ተገለጠለት። «የዳዊት ልጅ ዮሴፍ ሆይ» አለው፤ «ማርያምን ሚስትህ አድርገህ ወደ ቤትህ ለመውሰድ አትፍራ። የፀነሰችው ልጅ ከመንፈስ ቅዱስ ነው። ²¹ወንድ ልጅ ትወልዳለች፤ አንተም ስሙን ኢየሱስ ብለህ ልትሰይመው ይገባል፤ ሕዝቡን ከኃጢአታቸው የሚያድናቸው እርሱ ነውና።» ²²ይህ ሁሉ የሆነው ጌታ በነቢዩ አማካይነት የተናገረው ቃል እንዲፈጸም ነው፦ ²³«እነሆ፣ ድንግሊቱ ትፀንሳለች፤ ወንድ ልጅም ትወልዳለች፤ ሰዎችም አማኑኤል ብለው ይጠሩታል።» የዚህም ስም ትርጉም «እግዚአብሔር ከእኛ ጋር ነው» ማለት ነው።^{ef 24}ዮሴፍ ከእንቅልፉ ሲነሣ የጌታ መልአክ ያዘዘውን ፈጸመ። ሚስቱንም ወደ ቤቱ ወሰዳት። ²⁵ነገር ግን ወንድ ልጅ እስክትወልድ ድረስ ከእርሷ ጋር የግብረ ሥጋ ግንኙነት አልፈጸመም፤ ስሙንም ኢየሱስ ብሎ አወጣለት።^gh