ማቴዎስ 18

¹በዚያን ጊዜ ደቀ መዛሙርቱ ወደ ኢየሱስ መጥተው እንዲህ ብለው ጠየቁት፦ «እንግዲያውስ በመንግሥተ ሰማያት በማዕረግ ከሁሉ የሚበልጥ ማን ነው?» ²አንድ ትንሽ ልጅ ጠርቶ በመካከላቸው አቆመው። ³ከዚያም እንዲህ አለ፦ «እውነት እላችኋለሁ፣ ተመልሳችሁ እንደ ሕፃናት ካልሆናችሁ በምንም ዓይነት ወደ መንግሥተ ሰማያት አትገቡም። ⁴ስለዚህ በመንግሥተ ሰማያት ከሁሉ የሚበልጠው እንደዚህ ሕፃን ራሱን ዝቅ የሚያደርግ ሰው ነው። ⁵እንደዚህ ያለውን ሕፃን ስለ እኔ ብሎ የሚቀበል ሰው የሚቀበለው እኔን ነው።

⁶በእኔ ከሚያምኑት ከእነዚህ ታናናሾች አንዱን ወደ ኃጢአት የሚመራ ማንም ቢኖር ግን፣ አህያ የሚያዞረው ትልቅ የወፍጮ ድንጋይ በአንገቱ ታሥሮ ወደ ጥልቅ ባሕር ቢጣል ይሻለዋል። ⁷ሰዎችን ወደ ኃጢአት ከሚጥሉ ወጥመዶች የተነሣ ለዓለም ወዮለት! እንደነዚህ ያሉ ወጥመዶች መምጣታቸው አይቀርም፤ ነገር ግን እነርሱን ለሚያመጣ ሰው ወዮለት!

⁸እጅህ ወይም እግርህ ወደ ኃጢአት ቢመራህ ቆርጠህ ጣለው። ሁለት እጅ ወይም ሁለት እግር ይዘህ ወደ ዘላለም እሳት ከምትጣል ጉንድሽ ወይም አንካሳ ሆነህ ወደ ሕይወት ብትገባ ይሻልሃል። ⁹ዓይንህም ወደ ኃጢአት ቢመራህ አውጥተህ ጣለው። ሁለት ዓይን ይዘህ ወደ ገሃነም እሳት ከምትጣል አንድ ዓይና ሆነህ ወደ ሕይወት ብትገባ ይሻልሃል።

¹⁰ከእነዚህ ታናናሾች አንዱን እንኳ እንዳትንቁ ተጠንቀቁ። እላችኋለሁ፤ በሰማይ ያሉ መላእክታቸው በሰማይ ባለው በአባቴ ፊት ዘወትር ይቆማሉ።^{a 12}ምን እንደሚመስላችሁ ንገሩኝ። አንድ ሰው መቶ በጎች አሉት እንበል፤ ከእነርሱም አንዱ ተለይቶ ቢባዝን፣ ባለቤቱ ዘጠና ዘጠኙን በኮረብቶቹ ላይ ትቶ የባዘነውን ለመፈለግ አይሄድም? ¹³ባለቤቱም ቢያገኘው፣ እውነት እላችኋለሁ፣ ፈጽሞ ካልባዘኑት ከዘጠና ዘጠኙ ይልቅ በዚያ በአንዱ በግ እጅግ ይደሰታል። ¹⁴እንዲሁም በሰማይ ያለው አባታችሁ ከእነዚህ ታናናሾች አንዱ እንኳ እንዲጠፋ አይፈልግም።

¹⁵ወንድምህ ወይም እኅትህ ቢበድልህ ሄደህ ሁለታችሁ ብቻ ባላችሁበት ስሕተቱን ንገረው።^b ቢሰማህ ወንድምህን ወይም እኅትህን መልሰህ አገኘህ። ¹⁶አሁንም ባይሰማ “ክሱ ሁሉ በሁለት ወይም በሦስት ምስክሮች ቃል እንዲረጋገጥ” አንድ ወይም ሁለት ሰዎች ይዘህ ተመለስ። ¹⁷እነርሱንም ባይሰማ ጉዳዩን ለቤተ ክርስቲያን አቅርብ። ቤተ ክርስቲያንንም ባይሰማ እንደ ውጭ ሰው፣ እንደ አሕዛብ ሰው ወይም እንደ ቀራጭ ቁጠረው። ¹⁸እውነት እላችኋለሁ፣ በምድር የምታስሩት በሰማይ የታሰረ ይሆናል፤ በምድር የምትፈቱትም በሰማይ የተፈታ ይሆናል።^c

¹⁹ደግሞም እውነት እላችኋለሁ፤ ከእናንተ ሁለቱ እዚህ በምድር ላይ ስለሚለምኑት ስለ ማንኛውም ነገር በአንድ ልብ ቢስማሙ በሰማይ ያለው አባቴ ያደርግላቸዋል። ²⁰ሁለት ወይም ሦስት ሰዎች በስሜ በሚሰበሰቡበት ሁሉ እኔ በዚያ በመካከላቸው እገኛለሁና።»

²¹በዚያን ጊዜ ጴጥሮስ ወደ ኢየሱስ ቀርቦ እንዲህ ብሎ ጠየቀው፦ «ጌታ ሆይ፣ ወንድሜ ወይም እኅቴ ደጋግሞ ቢበድለኝ ስንት ጊዜ ይቅር ልበለው? እስከ ሰባት ጊዜ ድረስ?» ²²ኢየሱስም እንዲህ አለው፦ «እስከ ሰባት ጊዜ ብቻ አይደለም፤ እስከ ሰባ ሰባት ጊዜ እንጂ።^d

²³ስለዚህ መንግሥተ ሰማያት ከባሪያዎቹ ጋር ሒሳቡን ሊያጣራ የወሰነን ንጉሥ ትመስላለች። ²⁴ሒሳቡን ማጣራት ሲጀምር ዕዳው አንድ ሠራተኛ በመቶ ሺህ ዓመት ሠርቶ እንኳ የማያገኘው ገንዘብ የሆነ አንድ ሰው ወደ እርሱ ቀረበለት። ²⁵የሚከፍለው ስላልነበረው ጌታው እርሱ፣ ሚስቱ፣ ልጆቹና ያለው ሁሉ ተሽጠው ለዕዳው እንዲከፈል አዘዘ። ²⁶በዚህ ጊዜ ባሪያው በፊቱ መሬት ላይ ወድቆ እንዲህ ሲል ለመነው፦ “ጊዜ ይስጡኝ፤ ሁሉንም መልሼ እከፍልዎታለሁ።” ²⁷ጌታው ለዚያ ባሪያ አዘነለት። ፈታውም፤ ዕዳውንም ይቅር አለው። ²⁸ያ ባሪያ ግን ገና እንደ ወጣ የመቶ ቀን ደመወዝ ያህል ዕዳ ያለበትን ከባልንጀሮቹ ባሪያዎች አንዱን አገኘ። አንገቱን አንቆ ያዘው። “ያለብህን ክፈለኝ!” አለው። ²⁹ባልንጀራው ባሪያ መሬት ላይ ወድቆ እንዲህ ሲል ለመነው፦ “ጊዜ ስጠኝ፤ መልሼ እከፍልሃለሁ።” ³⁰እርሱ ግን አልተቀበለውም። ሄዶም ዕዳውን እስኪከፍል ድረስ ሰውየውን እስር ቤት አስገባው። ³¹ሌሎቹ ባሪያዎች የሆነውን ባዩ ጊዜ እጅግ ተበሳጩ። ወደ ጌታቸውም ሄደው ነገሩን ሁሉ ነገሩት። ³²ስለዚህ ጌታው አስጠርቶት እንዲህ አለው፦ “አንተ ክፉ ባሪያ! ለመንኸኝ፤ እኔም ያን ዕዳ ሁሉ ይቅር አልኩህ። ³³እኔ ለአንተ ያሳየሁህን ምሕረት አንተም ለባልንጀራህ ባሪያ ልታሳይ አይገባህም ነበር?” ³⁴ጌታውም ተቆጥቶ ዕዳውን ሁሉ እስኪከፍል ድረስ እንዲቆይ ለአሠቃዮች አሳልፎ ሰጠው።

³⁵እያንዳንዳችሁ ወንድማችሁን ወይም እኅታችሁን ከልብ ይቅር ባትሉ በሰማይ ያለው አባቴም እንዲሁ ያደርግባችኋል።»